اعاجاي-التاي تورابى   ›   اقپارات ايدىنى   ›   ماڭىزدى حابارلار

شي جينپيڭ گەرمانيانىڭ زۇڭليى مەركەلمەن كەزدەستى

  شينحۋا اگەنتتىگىنىڭ 9 - ايدىڭ 6 - كۇنى بەيجيڭنەن بەرگەن حابارى (ءتىلشى ليۋ حۋا). مەملەكەت ءتوراعاسى شي جينپيڭ 9 - ايدىڭ 6 - كۇنى بەيجيڭدە گەرمانيانىڭ زۇڭليى مەركەلمەن كەزدەستى.

  شي جينپيڭ بىلاي دەپ اتاپ كورسەتتى: كەزەكتە، ءبىز سىن - سايىس تولاسسىز تۋىلعان، حاۋىپ - قاتەر كۇن سايىن مولايعان داۋىردە تۇرمىز، سىڭار جاقتىلىق، قورعامپازدىق دۇنيە ءجۇزىنىڭ بەيبىتشىلىگىنە، ورنىقتىلىعىنا اۋىر قاتەر ءتوندىرىپ وتىر، ءارقانداي مەملەكەتتىڭ ءوز قامىن عانا كۇيتتەۋىنە بولماي قالدى. جۇڭگو مەن گەرمانيا جاۋاپكەرشىلىك ارقالايتىن ەكى ءىرى ەل رەتىندە، ستراتەگيالىق تىلدەسۋدى، سايكەسۋدى جانە سەلبەستىك جاساۋدى كۇشەيتىپ، قول ۇستاسا وتىرىپ ادامزات ءدوپ كەلگەن ورتاق سىن - سايىسقا توتەپ بەرۋى ءارقانداي كەزدەگىدەن دە قاجەتتى. بۇل جۇڭگو مەن گەرمانيا ەكى ەل جونىنەن عانا ەمەس، دۇنيە ءجۇزى جونىنەن دە بارعان سايىن ماڭىزدى بولا تۇسۋدە. ەكى جاق ءوزارا قۇرمەت ەتۋگە، تىلدەسۋگە، كەڭەسۋگە تاباندى بولىپ، ءبىر - ءبىرىنىڭ دامۋ جولىنا قۇرمەت ەتىپ، وزدەرىنىڭ وزەكتى مۇددەسىمەن ساناسىپ، تەڭ تۇرعىدا تىلدەسەتىن، ءوزارا پايدا جەتكىزىپ سەلبەسەتىن، اۋىس - كۇيىس جاساپ ءوزارا ۇلگى الاتىن ستراتەگيالىق سەرىك بولۋ كەرەك.

  شي جينپيڭ بىلاي دەپ باسا دارىپتەدى: جۇڭگو مەن گەرمانيانىڭ سەلبەستىك بالكۇلشەسىن ءتىپتى دە ۇلكەيتىپ جاساۋ كەرەك. ءسىزدىڭ وسى رەت جۇڭگوعا ساپارلاي كەلگەنىڭىزدە ەكى جاقتىڭ كوپتەگەن ەكونوميكا - ساۋدا سەلبەستىك تابىسىنا كەلىسۋى جۇڭگو جاقتىڭ ەسىك اشۋدى كەڭەيتۋ ۋادەسىن ورىنداعانىن دالەلدەدى. جۇڭگونىڭ بازارى ايتارلىقتاي كەڭ، سونىمەن قاتار دامۋعا ىلەسە بارعان سايىن زورايىپ، گەرمانيا مەن دۇنيە جۇزىندەگى ءارقايسى ەلدەرگە اناعۇرلىم كوپ تىڭ وراي اكەلەتىن بولادى. جۇڭگو مەن گەرمانيانىڭ اۆتوكولىك كاسىپ سالاسى سەلبەستىگى ەكى ەلدىڭ ءوزارا پايدا جەتكىزىپ، تەڭ يگىلىككە كەنەلۋىنىڭ تاماشا مىسالى. ەكى جاق اشىق ۇستاۋ، بولاشاقتى كوزدەۋ تانىمىن ساقتاپ، اۆتوماتتى كولىك جۇرگىزۋ، جاڭا ەنەرگيالى اۆتوكولىك، زەردەلى جاساۋ، جاساندى زەردە، سيفرلاندىرۋ جانە 5G قاتارلى جاڭادان گۇلدەنگەن سالالاردا سەلبەستىكتى كۇشەيتىپ، بولاشاق بازاردى ورتاق جەتىلدىرۋ جانە كەڭەيتۋ كەرەك. جۇڭگو جاق فينانستى جانە قىزمەت وتەۋ كاسىبىن اشىق ۇستاۋدى جەدەلدەتۋدە گەرمانيا جاقتىڭ قارجى قوسۋىن قارسى الادى. ءسىز تاعى ۋحاندا ساپاردا بولاسىز. گەرمانيا كاسىپورىندارىنىڭ چاڭجياڭ ەكونوميكالىق بەلدەۋ قۇرىلىسىنا ات سالىسۋىن قارسى الامىز. گۋمانيتارلىق جانە حالىق تىلەگى نەگىزىن تەرەڭدەي بەكەمدەپ، ەكى ەل حالقىنىڭ، اسىرەسە، جاستاردىڭ جۇڭگو مەن گەرمانيا قارىم - قاتىناسىن دامىتۋعا كەڭ كولەمدە ات سالىسۋىنا جانە قولداۋ كورسەتۋىنە قۇلشىنا قول جەتكىزۋ كەرەك. جاۋاپكەرشىلىك ارقالاۋدى ورتاق ايگىلەپ، حالىقارالىق ادىلدىكتى، تۋراشىلدىقتى قورعاپ، ەركىن ساۋدانى جانە كوپ جاقتىلىقتى قورعاپ، كليمات وزگەرىسى، افريكامەن بولعان سەلبەستىك سياقتى جاقتارداعى سەلبەستىكتى كۇشەيتۋ كەرەك.

  مەركەل مىنالاردى ءبىلدىردى: گەرمانيا مەن جۇڭگونىڭ تىلدەسۋىنىڭ، سەلبەستىگىنىڭ كولەمى كەڭ ءارى تەرەڭ، جۇڭگو گەرمانيانىڭ ەڭ ۇلكەن ساۋدا سەرىگى. ەكى ەل سەلبەستىگى اناعۇرلىم جاقسى بەتالىسپەن دامۋدا. گەرمانيا جۇڭگونىڭ ەسىك اشۋدى كەڭەيتۋ ساياساتىنىڭ جەتىستىگىنەن تەڭ يگىلىكتەنە العاندىعىنا قاباعات قۋانادى، جۇڭگوعا قارجى قوسۋدى ۇزدىكسىز ۇلعايتىپ، سەلبەستىك سالاسىن كەڭەيتىپ، گۋمانيتارلىق اۋىس - كۇيىستى جەبەۋدى قالايدى. سىڭار جاقتىلىق، قورعامپازدىق گەرمانياعا دا ءتيىمسىز ىقپال اكەلدى. ءارقايسى جاق الاۋىزدىقتى جانە قاجالىستى تىلدەسۋ ارقىلى اقىلداسىپ، ۇيلەسىمدى شەشۋگە كۇش سالۋى كەرەك. گەرمانيا جاق كوپ جاقتىلىق، ەركىن ساۋدا رۋحىن نەگىزگە الىپ، جۇڭگو جاقپەن حالىقارالىق ىستەردە تىلدەسۋدى، سايكەسۋدى كۇشەيتۋدى قالايدى. گەرمانيا جاق ەۆروپا مەن جۇڭگو قارىم - قاتىناسىن دامىتۋدا سىندارلى رول اتقارۋدى قالايدى.

  ەكى جاق تاعى كەزەكتەگى كەلەلى حالىقارالىق ماسەلەلەر جونىندە ىشكەرىلەي پىكىر اۋىستىرىپ، كەڭ كولەمدى ورتاق تانىمعا كەلدى.

  ۋاڭ ي، حى ليفىڭ قاتارلىلار كەزدەسۋگە قاتىناستى.

جاۋاپتى رەداكتور : ءاننا اكىمقان قىزى