اعاجاي-التاي تورابى   ›   اقپارات ايدىنى   ›   ايماقتاعى جاڭالىقتار

ايماعىمىزدىڭ قىسقى ساياحات سارا لەنيالارى شىنجىن قالاسىندا تانىستىرىلدى

  ەرىكتى تىلشىلەر دۇڭ شىجۇي، سۇي حاڭرۇي حابارلايدى. 9 ـ ايدىڭ 1 ـ كۇنى اۆتونوميالى رايوندىق مادەنيەت جانە ساياحات مەڭگەرمەسى باس بولىپ وتكىزگەن «شينجياڭ جاقسى جەر» اتىنداعى مادەنيەت پەن ساياحاتتى تانىستىرۋ جينالىسى شىنجىندا وتكىزىلدى، التاي ايماعىنىڭ قىسقى ساياحات سارا لەنيالارى جانە سيلاۋ ساياساتتارى ناق مايداندا قىزۋ قارسى الۋعا يە بولىپ، شىنجىن قالاسىنىڭ تۇرعىندارى مەن ساياحات ورىندارىنىڭ نازارىن اۋداردى.

  تانىستىرۋ جينالىسىندا التاي 10 ٴتۇرلى قىسقى ساياحات مازمۇنىن تانىستىرىپ، ساياحاتشىلاردى التايعا كەلىپ قار ـ مۇز الەمىن تاماشالاۋعا باۋرادى. گەنەرال تاۋى قارشاڭعى الاڭى، ۋشىلىك تابيعي قار باقشاسى، كوكتوعاي قار شاڭعى الاڭى قاتارلى ورىنداردا وتكىزىلەتىن قارشاڭعى تەبۋ، كونكي تەبۋ قاتارلى دەنە تاربيە نىساندارى كورەرمەندەردى ەرەكشە باۋرادى.

  «شينجياڭنىڭ كۇزگى كورىنىسى ەرەكشە كوركەم، ەكرانداعى كەسكىندى كورىپ، قاناستىڭ كۇزگى كورىنىسىنە تاڭ قالدىم، بەينە سۋرەت سياقتى. بيىل كۇزدە قاناسقا بارامىن» ـ دەدى شىنجىن قالاسىنىڭ تۇرعىنى لي چياڭ.

  شىنجىن قالاسىنىڭ تۇرعىنى ۋاڭ يىڭيىڭ بىلاي دەدى: «شىنجىندىقتار ەجەلدەن قار كورمەگەن، التايدىڭ قار ـ مۇز ساياحاتى جونىندەگى تانىستىرۋدى تىڭداپ ەرەكشە اسەرلەندىم، بيىل قىستاق دوستارىممەن بىرگە التايعا بارىپ جاڭا جىلدى وتكىزبەكشىمىن».

  تانىستىرۋ جينالىسىندا التاي ايماقتىق مادەنيەت ـ دەنەتاربيە، راديو ـ تەلەۆيزيا جانە ساياحات مەكەمەسىنىڭ ورىنباسار باستىعى نيە پيڭ التايدىڭ قىسقى ساياحات بايلىعىن تانسىتىرىپ، قار كورىنىستەرىن تاماشالاۋ، قارشاڭعى تەبۋ، اسىل ىزدەۋ قاتارلى ساياحات سارا لەنيالارىن تانىستىرىپ، 2019 ـ جىلعى قىسقى ساياحاتتاعى ٴتيىمدى ساياساتتاردى جاريالادى. تانىستىرۋعا قاراعاندا، قىس ماۋسىمىندا ساياحاتشىلاردى جەتكىزۋمەن بىرگە، ايماقتا 3 كۇننەن ارتىق ۋاقىت ايالدايتىن (2 كەش قونۋدى قامتيدى) ساياحات ورىندارىنا 1 : 1 سالىستىرماسى بويىنشا قاناس كورىنىس رايونىنىڭ قاۋىرت مەزگىلدەگى ەسىك بەلەتىن (ارالىق كولىكتىڭ بەلەت قامتىلمايدى) تارتۋ ەتەدى؛ قىس ماۋسىمىندا ساياحاتشىلاردى جەتكىزۋمەن بىرگە، ايماقتا 2 كۇننەن ارتىق ۋاقىت ايالدايتىن (ٴبىر كەش قونۋدى قامتيدى) ساياحات ورىندارىنا، ٴار 100 ساياحاتشىعا 10 مىڭ يۋان سيلىق بەرۋ ولشەمى بويىنشا سيلىق بەرىلەدى؛ قىس ماۋسىمىندا 500 دەن استام ساياحاتشى تاسىمالداعان ساياحات ورىندارىن قاتارعا تۇرعىزىپ، الدىڭعى 6 ورىندى يەلەگەن ساياحات ورىندارىنا جەكە ـ جەكە 200 مىڭ يۋان، 150 مىڭ يۋان، 100 مىڭ يۋان، 50 مىڭ يۋان، 30 مىڭ يۋان سيلىق بەرەدى. سونىمەن بىرگە، ارناۋلى ۇشاق، ارناۋلى پويەز مايلاعاندارعا ايماق سايكەستى سيلاۋ ساياساتىن قولدانادى.

  التاي قالالىق مادەنيەت ـ دەنەتاربيە، راديو ـ تەلەۆيزيا جانە ساياحات مەكەمەسىنىڭ ورىنباسار باستىعى ۋ حاييان بىلاي دەدى: «ساياحاتشىلار ۇشاق بەلەتى مەن پويەز بەلەتى ارقىلى گەنەرال تاۋى قارشاڭعى الاڭىنا اقىسىز كىرىپ قالماستان، التاي قالاسى قىس ماۋسىمىندا الۋان ٴتۇرلى قيمىل وتكىزىپ، ساياحاتشىلاردىڭ التايدى ويداعىداي ساياحاتتاۋىنا مۇمكىندىك تۋدىرادى».

  بۋىرشىن اۋداندىق چيسايحى ساياحاتقا قارجى قوسۋ شەكتى سەرىكتەستىگىنىڭ باس القاسى جۋ باۋيان بىلاي دەدى: «بۋىرشىن اۋدانى قىس ماۋسىمىندا ەرەكشەلىككە يە قىراۋ مەرەكەسىن وتكىزىپ قالماستان، ٴدامدى تاعامدار مەرەكەسى، كوركەمونەر مەرەكەسى قاتارلى قيمىلداردى وتكىزەدى. مەرەكە ـ مەيرام كەزىندە مۇز ٴۇستى سپورت قيمىلدارى، ەرەكشەلىككە يە تاۋار كورمەسى، ات ونەرى قاتارلى قيمىلداردى وتكىزىپ، ساياحاتشىلارعا بۋىرشىن اۋدانىنىڭ قىسقى كەلبەتىن ايگىلەيدى».

  قاتىناس تاسىمالى جاعىندا التايدان ٴۇرىمجى، كورلا، قارامايلى، قۇلجا، حوتان، اقسۋ، قاشقار، شاۋەشەك قاتارلى شينجياڭداعى 9 قالاعا، سونداي ـ اق گۋاڭجوۋ، جىڭجوۋ، چۇڭچيڭ، شي ـ ان قاتارلى ەل ىشىندەگى 4 قالاعا تىكە ۇشاق قاتىنادى نەمەسە ايالدادى. بۋرىلتوعاي اۋدانىنا، بەيتۇن قالاسىنا، التاي قالاسىنا پويەز قاتىنادى، مەملەكەت جولىنىڭ، ولكە جولىنىڭ جانە ساياحات ارناۋلى جولىنىڭ دارەجەسىن جوعارىلاتىپ، وزگەرتىپ سالىپ، جاڭادان 5 جوعارى قارقىندى تاس جول جاسالىپ، «جوعارى قارقىندى تاس جولدار اۋداندارعا، قالالارعا، دارەجەلى جولدار اۋىلدارعا، قىستاقتارعا ۇلاسقان، تاس جول كورىنىس تۇيىندەرىنە دەيىن جەتكەن» تاس جول تورىن قالىپتاستىردى. سونىمەن بىرگە، قىس ماۋسىمىندا بارلىق تاس جولدار اشىلىپ، نەگىزگى كورىنىس رايوندارىنا قار كۇرەۋ ماشيناسى، توپىراق كۇرەۋ ماشيناسى، شۇعىل قۇتقارۋ كولىگى قاتارلىلار ورنالاستىرىلىپ، اۋەجاي مەن پويەز بەكەتى ساياحاتشىلارعا «ٴبىر پۋنكت فورماسىندا» قىزمەت وتەپ، قىسقى ساياحاتتا قاتىناستىڭ ىركىلىسسىز بولۋىن قامتاماسىزداندىرادى.

  شىنجىن FELT ساياحات ورنىنىڭ جاۋاپتىسى كۇڭ شۋاڭ التايدىڭ قولايلى تاس جول شارت ـ جاعدايى مەن سارا ساياحات لەنياسىنان پايدالانىپ، التايعا ساياحاتشىلاردى كوبىرەك جەتكىزىپ، ٴوزارا تيىمدىلىك جاساپ، تەڭ يگىلىككە كەنەلۋدى جۇزەگە اسىراتىندىعىن ٴبىلدىردى.

جاۋاپتى رەداكتور : ءاننا اكىمقان قىزى