اعاجاي-التاي تورابى   ›   اقپارات ايدىنى   ›   سۋرەتتى حابارلار

شي جينپيڭ امەريكانىڭ زۇڭتۇڭى ترامپپەن ءديدارلاستى

  6 - ايدىڭ 29 - كۇنى مەملەكەت ءتوراعاسى شي جينپيڭ امەريكانىڭ زۇڭتۇڭى ترامپپەن وساكادا ءديدارلاستى. سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن

  شينحۋا اگەنتتىگىنىڭ 6 - ايدىڭ 29 - كۇنى وساكادان بەرگەن حابارى (تىلشىلەر چىن جى، حو شياۋگۋاڭ، لو جۇن). مەملەكەت ءتوراعاسى شي جينپيڭ 6 - ايدىڭ 29 - كۇنى امەريكانىڭ زۇڭتۇڭى ترامپپەن وساكادا ءديدارلاستى. ەكى ەلدىڭ مەملەكەت باسشىلارى جۇڭگو - امەريكا قارىم - قاتىناسىنىڭ دامۋىنا ساياتىن ءتۇبىرلى سيپاتتى ماسەلەلەر، كەزەكتەگى جۇڭگو - امەريكا ەكونوميكا - ساۋدا قاجالىسى، سونداي - اق ورتاق كوڭىل بولەتىن حالىقارالىق جانە وڭىرلىك ماسەلەلەر جونىندە ىشكەرىلەي پىكىر اۋىستىرىپ، كەلەر ساتىداعى ەكى ەل قارىم - قاتىناسىنىڭ دامۋىنا باعدار بەلگىلەپ، جول باستاپ، سايكەسۋدى، سەلبەسۋدى، ورنىقتىلىقتى جالپى ارنا ەتكەن جۇڭگو - امەريكا قارىم - قاتىناسىن ىلگەرىلەتۋگە قوسىلدى.

  شي جينپيڭ بىلاي دەپ اتاپ كورسەتتى: جۇڭگو - امەريكا قارىم - قاتىناسى دۇنيە جۇزىندەگى ەڭ ماڭىزدى ەكى جاقتى قارىم - قاتىناستىڭ ءبىرى. جۇڭگو مەن امەريكا ديپلوماتيالىق قارىم - قاتىناس ورناتقان 40 جىلعا قايىرىلا قاراساق، حالىقارالىق اۋقىم مەن ەكى ەل قارىم - قاتىناسىندا وراسان زور وزگەرىستەر جارىققا شىقتى، الايدا نەگىزگى اقيقات باستان - اياق وزگەرمەدى، ياعني جۇڭگو مەن امەريكا سەلبەسسە ەكى جاققا دا ءتيىمدى، بەلدەسسە ەكى جاق تا زيانعا ۇشىرايدى، سەلبەسۋ قاجالىستان جاقسى، تىلدەسۋ قارسىلاسۋدان جاقسى. قازىر جۇڭگو - امەريكا قارىم - قاتىناسى ءىشىنارا قيىنشىلىقتارعا ۇشىرادى، بۇل ەكى جاقتىڭ مۇددەسىنە ۇيلەسپەيدى. جۇڭگو مەن امەريكا ەكى ەلدە ءىشىنارا الاۋىزدىقتار ساقتالعانىمەن، ەكى جاقتىڭ مۇددەسى ايرىقشا توعىسقان، سەلبەسۋ اياسى كەڭ، ايتىلمىس قاقتىعىستىڭ، قارسىلاسۋدىڭ تۇزاعىنا تۇسپەۋى، قايتا ءبىر - ءبىرىن جەبەپ، بىرگە دامۋى كەرەك. زۇڭتۇڭ مىرزا جۇڭگو - امەريكا قارىم - قاتىناسىن جاقسارتۋدى ءۇمىت ەتەمىن دەپ كوپ رەت ايتقان ەدىڭىز؛ ءسىز تاعى ەكى جاقتىڭ ءبىر - بىرىنە قۇرمەت ەتۋىن، ءوزارا تيىمدىلىك جاساپ، ءبىر - بىرىنە پايدا جەتكىزۋىن جۇزدە - ءجۇز قولدايمىن دەگەنسىز. بۇل ءبىزدىڭ مىقتاپ يگەرۋگە ءتيىستى دۇرىس بەتالىسىمىز. ەكى جاق زۇڭتۇڭ مىرزا ەكەۋىمىز تۇراقتاندىرعان پرينسيپ پەن بەتالىسقا ساي، ءار جىكتەگى اۋىس - كۇيىستى ساقتاپ، ءار سالاداعى سەلبەستىكتەردى كۇشەيتىپ، سايكەسۋدى، سەلبەسۋدى، ورنىقتىلىقتى جالپى ارنا ەتكەن جۇڭگو - امەريكا قارىم - قاتىناسىن بىرگە ىلگەرىلەتۋى كەرەك.

  ترامپ مىنالاردى ءبىلدىردى: ءتوراعا شي جينپيڭمەن تاعى دا كەزدەسكەنىمە اسا قۋانىشتامىن. مەنىڭ 2017 - جىلى جۇڭگوعا ساپارلاي بارعانىم ءالى ەسىمدە، ول مەنىڭ ەڭ كوڭىلدى ءبىر رەتكى ساپارىم بولدى. مەن اسا كەرەمەت جۇڭحۋا وركەنيەتىن جانە جۇڭگو قول جەتكىزگەن ەرەكشە ۇلى جەتىستىكتەردى ءوز كوزىممەن كوردىم. جۇڭگوعا دۇسپاندىق نيەتىم جوق، ەكى ەل قارىم - قاتىناسىنىڭ جاقسارا ءتۇسۋىن ءۇمىت ەتەمىن. مەن ءتوراعا شي جينپيڭمەن تاماشا قارىم - قاتىناستى ساقتاۋدى قادىرلەيمىن، جۇڭگومەن سەلبەسۋدى كۇشەيتۋدى قالايمىن. ترامپ مىنانى ءبىلدىردى: امەريكا جاق جۇڭگو جاقپەن ەكى ەلدىڭ مەملەكەت باسشىلارى تۇراقتاندىرعان پرينسيپكە جانە بەتالىسقا ساي، قۇلشىنا قىزمەت ىستەپ، سايكەسۋدى، سەلبەسۋدى، ورنىقتىلىقتى جالپى ارنا ەتكەن امەريكا - جۇڭگو قارىم - قاتىناسىن بىرگە ىلگەرىلەتەدى، سونداي - اق امەريكا - جۇڭگو مەملەكەت باسشىلارىنىڭ وسى رەتكى ءديدارلاسۋى امەريكا - جۇڭگو قارىم - قاتىناسىنىڭ دامۋىن پارمەندى تۇردە ىلگەرىلەتەتىندىگىنە سەنەدى.

  ەكونوميكا - ساۋدا ماسەلەسى جونىندە شي جينپيڭ بىلاي دەپ باسا دارىپتەدى: تۇبىرىنەن الىپ ايتقاندا، جۇڭگو - امەريكا ەكونوميكا - ساۋدا سەلبەستىگىنىڭ ءمانى − ءوزارا پايدا جەتكىزىپ ەكى جاق يگىلىككە كەنەلۋ. جۇڭگو مەن امەريكا ەكى جاقتا دا وراسان زور مۇددەلىك توعىسۋلار بار، ەكى ەل سەلبەسەتىن جاقسى سەرىك بولۋى ءتيىس، بۇل جۇڭگوعا ءتيىمدى، امەريكاعا ءتيىمدى، سونداي - اق دۇنيە جۇزىنە دە ءتيىمدى. جۇڭگو جاق امەريكا جاقپەن ۇزبەي كەلىسسوز وتكىزىپ، الاۋىزدىقتاردى مەڭگەرۋگە پەيىلدى، الايدا، كەلىسسوز تەڭ تۇرعىدا بولۋى، ءوزارا قۇرمەت ەتۋدى ايگىلەۋى، ءبىر - ءبىرىنىڭ ورىندى ءجىتى قاداعالاپ وتىرعان ماسەلەلەرىن شەشۋى كەرەك. جۇڭگونىڭ يەلىك ۇقىعى مەن ار - نامىسىنا ساياتىن ماسەلەلەردە جۇڭگو، ءسوز جوق، ءوزىنىڭ وزەكتى مۇددەسىن قورعايدى. دۇنيە ءجۇزى بويىنشا الدىڭعى ەكى ۇلكەن ەكونوميكالىق تۇلعا رەتىندە جۇڭگو - امەريكا اراسىنداعى الاۋىزدىقتاردى تۇبىندە تىلدەسۋ، كەڭەسۋ ارقىلى ءوزارا قابىلداي الاتىن ادىستەردى قاراستىرىپ شەشۋ كەرەك.

  شي جينپيڭ بىلاي دەپ باسا دارىپتەدى: جۇڭگو جاق امەريكا جاقتىڭ جۇڭگو كاسىپورىندارى مەن امەريكادا وقىپ جاتقان جۇڭگولىق وقۋشىلارعا ءادىل مامىلە جاساۋىن، ەكى ەل كاسىپورىندارىنىڭ ەكونوميكا - ساۋدا، قارجى قوسۋدا قالىپتى سەلبەستىك جاساۋىنا جانە ەكى ەل حالقىنىڭ قالىپتى اۋىس - كۇيىس جاساۋىنا كەپىلدىك ەتۋىن ءۇمىت ەتەدى.

  ترامپ بىلاي دەدى: امەريكا جاق كەڭەسۋ ارقىلى ەكى ەلدىڭ ساۋدا تەپە - تەڭدىگىن ۇيلەسىمدى شەشىپ، ەكى ەل كاسىپورىندارىن ءادىل مامىلەمەن قامتاماسىز ەتەدى. امەريكا جاق ەندىگارى جۇڭگونىڭ ەكسپورتتىق ونىمدەرىنە جاڭادان كەدەن باجىسىن ۇستەمەلەپ سالمايدى. جۇڭگو جاقتىڭ امەريكادان يمپورتتى ارتتىرۋىن ءۇمىت ەتەدى. امەريكا جاق جۇڭگو جاقپەن بىرگە ءوزارا قابىلداي الاتىن ساۋدا كەلىسىمىنە كەلۋدى قالايدى، بۇل تاريحي ءمان الادى.

  ەكى ەلدىڭ مەملەكەت باسشىلارى تەڭ تۇرعىدا جانە ءوزارا قۇرمەت ەتۋ نەگىزىندە ەكونوميكا - ساۋدا كەڭەسىن قايتا باستاۋعا قوسىلدى، امەريكا جاق ەندىگارى جۇڭگونىڭ ونىمدەرىنە جاڭادان كەدەن باجىسىن ۇستەمەلەپ سالمايدى. ەكى ەلدىڭ ەكونوميكا - ساۋدا ۇيىمى ناقتى ماسەلەلەر جونىندە تالقى ورىستەتەدى.

  ترامپ مىنانى ءبىلدىردى: جۇڭگودا كوپتەگەن ەرەكشە ۇزدىك وقۋشىلار بار. مەن ەجەلدەن جۇڭگو وقۋشىلارىنىڭ امەريكاعا بارىپ وقۋىن قارسى الىپ كەلەمىن.

  شي جينپيڭ جۇڭگو ۇكىمەتىنىڭ تايۋان ماسەلەسى جونىندەگى پرينسيپتىك تۇرعىسىن بايىمدادى. ترامپ مىنانى ءبىلدىردى: مەن جۇڭگو جاقتىڭ تايۋان ماسەلەسىندە ءجىتى قاداعالاپ وتىرعان ىستەرىنە ءمان بەرەمىن، امەريكا جاق ءبىر جۇڭگو ساياساتىن جالعاستى اتقارادى.

  شي جينپيڭ جۇڭگو جاقتىڭ چاۋشيان تۇبەگى ماسەلەسىندەگى پرينسيپتىك تۇرعىسىن قايتالاي دارىپتەپ مىنالاردى ءبىلدىردى: جۇڭگو جاق امەريكا - چاۋشيان باسشىلارىنىڭ تىلدەسۋدى، بارىس - كەلىستى ساقتاۋىن قولدايدى، امەريكا - چاۋشيان ەكى جاقتىڭ يكەمدىلىكتى ايگىلەپ، ءبىر باعىتتى بەتكە الىپ، تىلدەسۋدى تەز ارادا قايتا باستاپ، ءبىر - ءبىرىنىڭ ءجىتى قاداعالاپ وتىرعان ماسەلەلەرىن شەشۋ ءادىسىن قاراستىرۋىن ءۇمىت ەتەدى. جۇڭگو جاق وسى جونىندە ۇزبەي سىندارلى رول اتقارۋدى قالايدى. ترامپ مىنانى ءبىلدىردى: امەريكا جاق جۇڭگو جاقتىڭ چاۋشيان تۇبەگى ماسەلەسىندەگى ماڭىزدى رولىنا ءمان بەرەدى، جۇڭگو جاقپەن تىلدەسۋدى، سايكەسۋدى قالايدى.

  ديڭ شۋەشياڭ، ليۋ حى، ياڭ جيەچى، ۋاڭ ي، حى ليفىڭ، سونداي - اق امەريكانىڭ مەملەكەت ىستەر حاتشىسى پومپەو، قازىنا مينيسترى منۋچين سياقتى ۇكىمەتتىڭ جوعارى دارەجەلى ءمانساپتىلارى قاتىناستى.

جاۋاپتى رەداكتور: ءاننا اكىمقان قىزى
  • شي جينپيڭ 20 ەل توبى باسشىلارىنىڭ 14 - رەتكى باسشىلار ماجىلىسىنە قاتىناستى ءارى ماڭىزدى ءسوز سويلەدى
  • شي جينپيڭ 9 - كەزەكتى مەملەكەتتىك ”حالىق رازى مەملەكەت قىزمەتكەرلەرى“ جانە ”حالىق رازى مەملەكەت قىزمەتكەرلەرى كوللەكتيۆتەرى“ بولىپ ماداقتالىپ - سيلانعانداردىڭ ۋاكىلدەرىمەن كەزدەستى
  • نەگىزگى تاقىرىپتىق تاربيەنى دەن قويا ۇيىمداستىرىپ، تىڭعىلىقتى تۇردە ويداعىداي ورىستەتىپ، ورنىقتىلىق، دامۋ قىزمەتىنىڭ تاعى تىڭ ورەگە كوتەرىلۋىن ىلگەرىلەتەيىك
  • شي جينپيڭ پيڭراڭعا بارعاندا، قىزۋ قارسى الۋعا بولەندى