اعاجاي-التاي تورابى   ›   مادەنيەت ارناسى   ›   بىلگەنگە مارجان

نەكەدەگى كۇيزەلىستى قالاي جەڭەمىز؟

  وتباسىلىق ءومىر قۋانىشتى ساتتەرمەن قاتار قيىندىقتاردان دا تۇرادى. كەي وتباسىلىق جۇپ ماسەلەنى شەشە الماي ايىرىلىسىپ جاتادى. نازارىڭىزعا ەرلى-زايىپتىلار اراسىندا كەزدەسەتىن كۇيزەلىستەردى جانە ونى جەڭۋ جولدارىن ۇسىنامىز.

  العاشقى جىل كۇيزەلىسى

  ءبىرىنشى جىلدىڭ سوڭىنا قاراي ەرلى-زايىپتىلار اراسىندا تۇسىنپەۋشىلىكتەر كوبەيە باستايدى. ەگەر بۇرىن سۇيىكتىسى تەك جاعىمدى قاسيەتتەردەن تۇرسا، ەندى كەمشىلىكتەرى ارتا باستاعانداي كورىنەدى. ولاردىڭ بۇرىن بايقاماعان ادەتتەرى ءبىر-ءبىرىنىڭ جۇيكەسىنە تيەدى. شاشىلعان كيىمگە، دۇرىس پىسپەگەن تاماققا جانە باسقا دا ۇيدەگى شارۋالارعا نارازىلىقتار پايدا بولادى.

  كەڭەس: ەگەر سەرىگىڭىزدى ءوز تابيعي بولمىسىمەن قابىلداساڭىز، بۇل كەزەڭ جەڭىلدەيدى. سەرىگىڭىزدى وزگەرتۋگە تىرىسپاڭىز. بارلىق تۇسىنىسپەۋشىلىكتى بىردەن تىكە، بىراق سابىرمەن ايتىڭىز. ول پروبلەمانى ءسىز قالاي كورەتىنىڭىزدى ايتىڭىز. بىراق ءوزىڭىز دە سىن قابىلداۋعا دايىن بولىڭىز.

  بالانىڭ دۇنيەگە كەلۋ كۇيزەلىسى

  ءبىرىنشى دۇنيەگە بالا كەلگەندە ەرلى-زايىپتىلاردىڭ ءومىرى تۇبەگەيلى وزگەرەدى. جاس انا بارلىق ۋاقىتىن جاڭا تۋىلعان سابيگە ارنايدى جانە كوپ شارشايدى. ول جولداسىنا دەگەن قاتىناسقا اسەر بەرەدى. ۇيقىسى قانباي، شارشاپ جۇرگەن اناعا اشۋ ۇستىندە كۇيەۋىنە دەگەن سەزىمى سۋىپ بارا جاتقانداي كورىنەدى. قامقورلىقتىڭ جوعالعانىن سەزەتىن ەر ادامعا دا قيىنعا سوعادى، پروبلەمانىڭ نەدە ەكەنىن تۇسىنە المايدى.

  كەڭەس: بۇل جاعدايدى رەتكە كەلتىرۋ ايەلدىڭ قولىندا دەسەك، قاتەلەسپەيمىز. ايەل ءوز زەيىنى مەن قامقورلىعىن دۇرىس ءبولۋدى ۇيرەنىپ، كۇيەۋىن بالا قاراۋعا ارالاستىرسا، بۇل كۇيزەلىستى جەڭەدى. سەبەبى كەيبىر ايەل بالانى دا ءوزى قاراپ، ءۇيدى دە ءوزى جيناپ، باسقا دا شارۋالاردى ءوزى شەشۋگە تىرىسادى: ناتيجەسىندە، قاتتى شارشاپ، كوڭىل كۇيى ءتۇسىپ، ونىڭ اسەرى بۇكىل وتباسى مۇشەلەرىنە تيەدى. سوندىقتان، ءۇي شارۋالارىن ۋاقىتشا ىسىرا تۇرىپ، بالا ۇيىقتاعاندا بىرگە دەمالىپ الۋعا تىرىسۋ كەرەك. ال ىدىس-اياق جۋ سەكىلدى ۇساق-تۇيەك شارۋالاردى بالانىڭ قاسىنا وتىراتىن ادام كەلگەندە دە جاساپ ۇلگەرەسىز. بالا كەرىسىنشە، وتباسىنى نىعايتادى. نارەستە كەزەڭى ماڭگى ەمەس، سوندىقتان شىدامدى بولىڭىز.

  ورتا جاس كۇيزەلىسى

  ورتا جاس كۇيزەلىسى جاسوسپىرىمدىك كەزەڭگە ۇقسايدى. ەرلى-زايىپتىلار وزدەرىن ىزدەۋمەن، ومىردەگى ورنىن انىقتاۋمەن، الدا نە كۇتىپ تۇرعانىن ويلاۋمەن اۋرە بولادى. ەگەر وتباسىلىق جۇپتىڭ اراسىندا ەرەكشە جاقىندىق بولماسا، بۇل كەزەڭدى اركىم جالعىز وتكەرەدى. ال ول ءوز كەزەگىندە ەرلى-زايىپتىلاردى ودان ءارى بولەكتەتە تۇسەدى. ولاردا جالعىزدىق پەن ومىرگە قاناعاتتانبايتىن سەزىم پايدا بولادى.

  كەڭەس: ەگەر ەرلى-زايىپتىلار ءبىر-ءبىرىن تۇسىنۋگە تىرىسسا، بۇل كەزەڭدى وتكەرۋ وڭاي بولادى. ومىرلەرىنە قۋانىش كىرگىزۋ كەرەك. ءبىر-بىرىنە اسا ءمان بەرىپ، قوشەمەت سوزدەر ايتىپ، توسىنسىيلار جاساۋ قاجەت. بىرگە ساياحاتتاۋ ەرلى-زايىپتىلار اراسىنداعى كۇيزەلىستى جەڭۋگە كومەكتەسەدى. باسقا قالاعا نەمەسە باسقا ەلگە ساياحاتتاۋ مىندەتتى ەمەس، تابيعات اياسىنا شىعۋدىڭ ءوزى جاعىمدى اسەر بەرەدى. ءبىر-بىرىنە كوڭىل اۋدارىپ، قامقور بولا بىلگەن جۇپتار كەز كەلگەن قيىندىقتى بىرگە وتكەرە الادى. ءبىر-بىرىنە دەگەن كوڭىلدەرى سۋىماس ءۇشىن، ءبىر-بىرىنەن جالىقپاس ءۇشىن قاتىناستى جاڭارتۋعا كۇش سالۋ كەرەك. ەندەشە، وتباسىداعى قارىم-قاتىناستى جاڭارتۋعا ارنالعان كەڭەستەردى وقي وتىرىڭىز.

جاۋاپتى رەداكتور: ءاننا اكىمقان قىزى
  • شي جينپيڭ شاڭحاي سەلبەستىك ۇيىمىنا مۇشە ەلدەر مەملەكەت باسشىلارى القالار كەڭەسىنىڭ 19 - رەتكى ماجىلىسىنە قاتىناستى ءارى ماڭىزدى ءسوز سويلەدى
  • شي جينپيڭ قىرعىزستاننىڭ پرەزيدەنتىمەن كەزدەستى
  • شينجياڭنىڭ بۋرىلتوعاي اۋدانى: تۇيە باعىمشىلىعىمەن دوڭگەلەك داۋلەتتى ورەگە جەتۋگە قۇلشىنۋدا
  • ءبىر اپتالىق اۋا رايىنان الدىن الا مالىمەت