اعاجاي-التاي تورابى   ›   مادەنيەت ارناسى   ›   ونەگە

بالانىڭ ويلاۋىن قالاي وركەندەتەمىز؟

  بالانىڭ ويلاۋى. بالا اينالاسىنداعى زاتتاردى، كورىنىستى ءبىلىپ قانا قويمايدى، سولاردى ۇققىسى كەلەدى. ياعني سولار تۋرالى ۇعىم جاساۋعا، وي شىعارۋعا ۇمتىلادى. ءۇش جاستان بىلاي بالا دامىلسىز «مىناۋ نە؟ بۇل نەگە جاتادى؟ مىناۋ ءىس نە ءۇشىن ىستەلەدى؟» دەگەن سىقىلدى سۇراۋلاردى بەرە بەرەدى. مىنە، وسى سۇراۋلار بالادا ويلاۋ بولاتىنىن كورسەتەدى، ءبىراق بالانىڭ ويلاۋى تەرەڭ ەمەس. بالانىڭ جانىندا سۋرەتتەۋلەر از. سۋرەتتەۋلەردەن ۇعىم جاساي المايدى. سوندىقتان بالانىڭ ءبىر زات تۋرالى ۇعىمى سول زاتتىڭ سۋرەتى بولادى. مىسالى، بالا اعاش تۋرالى ويلاعاندا، بەلگىلى ءبىر اعاش تۋرالى عانا ويلايدى. بالادان «زات دەگەن نە؟» دەپ سۇراساڭ، «مەنىڭ بوركىم، مەنىڭ اتامنىڭ بوركى» دەيدى. بالانىڭ جاڭا وي شىعارۋى دا تەرەڭ ەمەس. دەدۋكتسيا بويىنشا، جالپىدان جالقىعا، يندۋكتسيا بويىنشا جالقىدان جالپىعا وي جۇرگىزۋدى بالا بىلمەيدى. بالا انالوگيا بويىنشا ويلايدى. مۇندا دا كوبىنەسە سىرتقى بولماشى سىندارىنا قارايدى. 2 جىل 10 ايلىق ءبىر بالا تارەلكەگە سۋ قۇيىپ، ىشىنە ەت سالىپتى. نە ءۇشىن؟ ەتتى سۋعا ەرىتەم دەپ. بۇرىن سولاي قانتتى ەرىتكەنى بار ەكەن. 10 جاسار ءبىر امەريكا بالاسىنىڭ مۇعالىمى تاپال بويلى، اشۋلانشاق ادام بولىپتى. ءبىر ۋاقىتتا وسى مۇعالىم كەتكەن سوڭ اكەسى باسقا ءبىر مۇعالىم الىپتى. بۇل مۇعالىم دە تاپال ەكەن. سوندىقتان جاڭا مۇعالىمگە بالا ايتىپتى: «مەن سىزدەن قورقام، ءسىز اشۋلانشاق شىعارسىز؟»-دەپ. «ونى قايدان ءبىلدىڭ؟»-دەپ سۇرايدى مۇعالىم. «ءسىز دە تاپال ەكەنسىز»،-دەپتى بالا.

  ويلاۋدى وركەندەتۋ جولدارى.

ويلاۋ ـــ جاننىڭ وتە ءبىر قيىن، تەرەڭ ءىسى. جاس بالاعا ويلاۋ تىم اۋىر. سوندىقتان تاربيەشى بالانىڭ ويلاۋىن وركەندەتكەندە ساقتىقپەن باسقىشتاپ ءىس ىستەۋ كەرەك.

   وركەندەتۋ جولدارى مىنالار:

  1. بالانىڭ جانىندا دۇرىس اسەرلەنۋلەر اشىق سۋرەتتەۋلەردىڭ كوپ بولۋىنا رۇحسات قىلۋ كەرەك. ويدىڭ ءوزىنىڭ تەرەڭ بولۋى ءۇشىن اسەرلەنۋ سۋرەتتەۋلەردىڭ كوپ جانە اشىق بولۋى كەرەك. بالاعا ءبىر پىكىردى ۇقتىرماقشى بولساق، جالاڭاش پىكىردى ايتۋدا قاسيەت جوق، بالا پىكىردى سۋرەتتەۋدىڭ وزىنەن شىعارىپ السىن.

  2.بالا زاتتاردى، كورىنىستەرى ۇقساس سىندارى بويىنشا تاپ-تاپقا ءبولىپ ۇيرەنسىن. مىسالى، دىبىستاردى، ارىپتەردى ءبولۋ، وسىمدىكتى، جانۋاردى تاپ-تاپقا ءبولۋ سىقىلدى، ءبىراق بالانى زاتتاردى، كورىنىستەردى تاپ-تاپقا بولگىزىپ ۇيرەتكەندە، جەڭىلدەن اۋىرعا كوشۋدى ەستەن شىعارماۋعا كەرەك.

  3. بالا كورىنىستەردىڭ، ويلاردىڭ ارالارىنداعى بايلامدى ولاردىڭ قايسىسى قايسىسىنا سەبەپ ەكەنىن تاۋىپ ۇيرەنسىن. بۇل بالاعا مىسالداردان ەرەجە-زاڭ شىعارتقىزىپ ۇيرەتۋ سىقىلدى ىستەرمەن بولادى.

جاۋاپتى رەداكتور: ءاننا اكىمقان قىزى
  • جاڭا دامۋ ۇستانىمىن دايەكتىلەندىرىپ، جوعارى ساپالى دامۋدى ىلگەرىلەتىپ، ورتا بولىك وڭىرلەردىڭ كوركەيۋىنىڭ جاڭا جاعدايىن قۇلشىنا اشۋ كەرەك
  • مەكتەپ باسقارىپ، ادام تاربيەلەۋ ورەسىن جاپپاي جوعارىلاتىپ، ارميانى قۇدىرەتتەندىرۋ ىستەرىنە دارىندىلار جاعىنان پارمەندى قولداۋ كورسەتۋ كەرەك
  • ءبىر اپتالىق اۋا رايىنان الدىن الا مالىمەت
  • 1000نان ارتىق مادەني ەسكەرتكىش شينجياڭ تاريحىن اڭگىمەلەدى