اعاجاي-التاي تورابى   ›   مادەنيەت ارناسى   ›   دەنساۋلىق

كۇنگە كۇيىپ قالساڭىز

  قازىر جاعاجاي ماۋسىمى. بىرەۋلەر ءوز ەركىمەن، كەيبىرەۋلەر ەركىنەن تىس كۇنگە كۇيىپ جاتادى. كۇنگە كۇيۋدىڭ پايداسىن يممۋنيتەت جاقسارىپ، قىستا اۋرۋ-سىرقاۋعا جول جابىلۋىمەن بايلانىستىرادى، دەگەنمەن ونىڭ جاعىمسىز جاقتارى دا بار. تەرى اشىپ، كۇلبىرەپ، قىشىپ مازانى الادى.

  قىزارىپ، قابىنىپ كەتكەن تەرىگە ەڭ جاقسى العاشقى كومەك ـــ ىلعال كومپرەسس قويۋ. ول اۋىرعاندى باسىپ، تەرىنى ىلعالداندىرادى. 15-20 مينۋت شاماسىندا ۇستاساڭىز بولادى. بولمە تەمپەراتۋراسىنداعى سۋدا ۆاننا قابىلداۋ دا جاقسى كومەكتەسەدى.

  كۇنگە كۇيگەن جەردى ەمدەۋدىڭ بىرنەشە حالىقتىق ءادىسى بار. مىسالى كۇيگەن تەرىنى الوە سىعىندىسىمەن سۇرتۋگە بولادى. حالىق اراسىندا سودا مەن كراحمال قوسىلعان ۆانناعا ءتۇسۋ ءادىسى دە بار.

  باستىسى كۇيگەنىڭىزدى بايقاعان ساتتە دەرەۋ كولەڭكەگە بارۋ كەرەك. سودان سوڭ ىستىق ەمەس تەمپەراتۋرادا تەرىنى سالقىنداتۋ كەرەك. كومپرەسس پەن ۆاننا ەم-شاراسىن كۇنىنە بىرنەشە رەت جاساعان دۇرىس. قانداي جاعداي بولعاندا دا سابىن مەن سكراب قولدانۋعا بولمايدى.

  بەت كۇيىپ قالعان جاعدايدا وعان كوك شايدان جاسالعان كومپرەسس قويادى. ەگەر قولدا كوك شاي بولماسا، جۇمساق ءارى ىلعال ورامال دا جارايدى. سالقىنداتاتىن گەل، جاقپا مايى سەكىلدى نارسەلەردى بەتكە، مۇرىنعا، يەك استىنا، مويىنعا، قۇلاققا، يىققا قولداناردا اباي بولعان ءجون، ول جەردىڭ تەرىسى اسا سەزىمتال. قارايۋعا ارنالعان مايدى دا قولدانباعان دۇرىس، ول كۇيىپ كەتكەن تەرىگە ارنالماعان.

  كومپرەستەن كەيىن زاقىمدالعان جەرلەرگە سپرەي شاشۋ نە ارنايى ىلعالداندىراتىن كرەم جاعۋ وڭ اسەرىن بەرەدى. سودان سوڭ تەرىنى تىنىقتىرۋ كەرەك. ەندى كۇن استىنا شىقپاي، كولەڭكە جەردە وتىرىڭىز.

  ەگەر كۇيىپ قالعاننان كەيىن شارشاپ، السىزدىك كۇي سەزىنسەڭىز، اسپيرين نە پاراتسەتامول ءىشىڭىز. جاعداي ءسىز ويلاعاننان جامان بولسا، اۋرۋ اسقىنىپ كەتۋى مۇمكىن. اپتاپ بولىپ نە قالتىراساڭىز، جۇرەك اينىپ، اۋىز قۇرعاپ، باس اۋىرسا، دەرەۋ جەدەل جاردەم شاقىرىپ، دارىگەرگە كورىنۋ كەرەك. ادەتتە مۇنداي جاعداي ادام كۇن استىندا ۇزاق ۋاقىت بويى ءجۇرىپ قالعاندا نە دەنەنىڭ كوپ بولىگى كۇيگەندە بولادى.

  اۋىرماڭىز، دەنساۋلىعىڭىزعا مۇقيات كوڭىل ءبولىڭىز.

جاۋاپتى رەداكتور: ءاننا اكىمقان قىزى
  • 1000نان ارتىق مادەني ەسكەرتكىش شينجياڭ تاريحىن اڭگىمەلەدى
  • ورنىقتىلىق بارىسىندا ىلگەرىلەۋ جالپى قىزمەت ارناسىنان جازباي، جاڭا دامۋ ۇستانىمىن دايەكتىلەندىرىپ، جوعارى ساپالى دامۋدى ىلگەرىلەتەيىك
  • شي جينپيڭ ازيا وركەنيەتتەر تىلدەسۋى جينالىسىنىڭ اشىلۋ سالتىنا قاتىناستى ءارى ارقاۋ ءسوز سويلەدى
  • كوكتوعاي: شاعىن قالاشىقتاعى كوپ حيكايا