اعاجاي-التاي تورابى   ›   اقپارات ايدىنى   ›   ماڭىزدى حابارلار

توزىمدىلىك. الەۋەتتىلىك. تاباندىلىق

— قازىرگى تاڭداعى جۇڭگو ەكونوميكاسىنا ۇڭىلگەندە
شينحۋا اگەنتتىگىنىڭ تىلشىلەرى جاۋ چاۋ، ان بەي، چىن ۋيۋي، ليۋ حۇڭشيا

  ”1 - مامىر“ دەمالىسى كەزىندە ەل ىشىندە ساياحاتتاۋشىلاردىڭ جالپى سانى 195 ميلليونعا (رەت) جەتىپ، تەمىر جولدىڭ ءبىر كۇندەگى جولاۋشى جونەلتۋ مولشەرى تاريحتاعى ەڭ جوعارى ورەگە شىقتى؛ 4 - ايدا جۇڭگونىڭ جاساۋ كاسىبىنىڭ ساتىپ الۋ ديرەكتورى كورسەتكىشى %50.1 بولىپ، ءۇرتىس 2 اي بويى كەڭەيۋ ارالىعىن ساقتادى؛ ءبىرىنشى توقساندا بۇكىل ەل بويىنشا كۇنىنە ورتا ەسەپپەن جاڭادان تىركەلگەن بازار تۇلعالارى 53 مىڭعا جەتىپ، سايكەس مەزگىلدەگىدەن %26.3 ارتتى...

  مىنە بۇل تىرشىلىك جالىن اتقان ماۋسىمداعى جۇڭگونىڭ ەكونوميكالىق دامۋىنىڭ جاندى بەينەسى.

  باستاما جاقسى بولسا، بولاشاقتان ءۇمىت كۇتۋگە بولادى. جۇڭگونىڭ ەكونوميكالىق ناقتى قۋاتى ۇزدىكسىز ارتىپ، الەۋەتى توقتاۋسىز ارىنداپ، تاباندىلىعىن وزگەرتپەي ساقتاپ، جوعارى ساپالى دامۋ جولىندا قيىندىقتاردى جەڭىپ، نىق قاداممەن العا ۇمتىلۋدا.

  - توزىمدىلىككە ۇڭىلسەك − ورنىقتى اينالىمدى ساقتاپ، ساپا ۇزدىكسىز ءوستى

  4 - ايدان بەرى، ىركەس - تىركەس جاريالانعان نەگىزگى كورسەتكىش، ساندى مالىمەتتەر جۇرتتىڭ نازارىن اۋداردى.

  ءبىرىنشى توقساندا جۇڭگو ەكونوميكاسى سايكەس مەزگىلدەگىدەن %6.4 ارتىپ، كۇردەلى دە قاتاڭ ەل ءىشى - سىرتى جاعدايىندا ەلىمىز ماكرولىق تىزگىندەۋگە ۇزدىكسىز جاڭالىق ەنگىزىپ جانە ونى كەمەلدەندىرىپ، ەكونوميكانىڭ ورنىقتى اينالىمىن ساقتادى؛

  ءبىرىنشى توقساندا بۇكىل ەلدە تۇرعىنداردىڭ تۇتىنۋ باعاسى سايكەس مەزگىلدەگىدەن %1.8 قىمباتتاپ، قىمباتتاۋ مولشەرى بىلتىرعى سول مەزگىلدەگىدەن 0.3 پايىز ءتۇستى، ەلىمىز ماڭىزدى تاۋارلار بازارىنداعى قامداۋدى كۇشەيتىپ، بازارداعى قامداۋ مەن قاجەتسىنۋ نەگىزىنەن تەپە - تەڭ بولدى؛

  شەتەل اقشاسى قورىنىڭ قالدىعى 3 تريلليون دوللاردىڭ ۇستىندە ساقتالدى، ەلىمىز ەسىكتى سىرتقا ايقارا اشۋعا تاباندى بولىپ، حالىقارالىق بازاردىڭ كوپ نەگىزدەنۋىن ىلگەرىلەتتى، حالىقارالىق كىرىس - شىعىس تەپە - تەڭدىكتى ساقتادى.

  وسى ناتيجەلەرگە ەلىمىزدىڭ ەكونوميكا جالپى مولشەرى 90 تريلليون يۋاننان اسۋ، دۇنيە ءجۇزى بويىنشا ەكىنشى ورىندى نىقتاپ يەلەۋ نەگىزىندە قول جەتتى.

  قارقىن مەن جالپى مولشەر جۇڭگو ەكونوميكاسىنىڭ بالاماسى بولۋدان قالدى، جاڭا داۋىردە جۇڭگو ەكونوميكاسى جوعارى ساپالى دامۋدىڭ ايقىن ەرەكشەلىگىمەن ءىرى ەل ەكونوميكاسىنىڭ توزىمدىلىگى مەن ناقتى قۋاتىن ايگىلەۋدە.

  توزىمدىلىك ورنىقتى اينالىمدا جارىققا شىقتى −

  ءبىرىنشى توقسانداعى ساندى مالىمەتتەر جاريالانعان سوڭ، رەيتەر اگەنتتىگىنىڭ شولۋىندا جۇڭگو ەكونوميكاسى ”مەجەدەگىدەن دە الدەقايدا ورنىقتى“ دەپ اتاپ كورسەتىلدى. امەريكا بىرىككەن اقپارات اگەنتتىگى جۇڭگو ەكونوميكاسىنىڭ ءبىرىنشى توقساندا ورنىقتىلىقتى ساقتاۋى قايتا كوتەرىلگەن ەكونوميكالىق ارتۋ مەن يمپورت سۇرانىسى السىرەپ بارا جاتقان عالامنىڭ ەكونوميكالىق قيمىلدارىن سەرپىلتۋگە سەپتىگىن تيگىزەدى دەپ ەسەپتەدى.

  باياندى، ورنىقتى ارتۋ، ۇزدىكسىز وسكەن ساپا − جۇڭگونىڭ دۇنيە ءجۇزى ەكونوميكاسىنا قوسقان ەڭ ۇلكەن ۇلەسى.

  ”دۇنيە ءجۇزى جۇڭگوعا مۇقتاج، عالام ەكونوميكاسىنىڭ ارتۋى جۇڭگونىڭ باياندى دامۋىنان قول ۇزە المايدى“، - دەدى حالىقارالىق اقشا قورى ۇيىمىنىڭ باس جوراسى لاگاردە.

  توزىمدىلىك حالىقتىڭ ىرىس - قۇتىندا ايگىلەندى −

  حالىق تۇرمىسىنا تيىمدىلىك جاسالدى، كىرىس ورنىقتى بولدى. بيىل 1 - ايدان 3 - ايعا دەيىن، بۇكىل ەلدەگى قالا - قالاشىقتاردا جاڭادان 3 ميلليون 240 مىڭ ادام جۇمىسقا ورنالاستىرىلدى؛ ءبىرىنشى توقساننىڭ اياعىندا بۇكىل ەلدەگى قالا - قالاشىقتاردا تىركەلگەن جۇمىسسىزدىق سالىستىرماسى %3.67 بولىپ، سايكەس مەزگىلدەگىدەن 0.22 پايىز تومەندەدى.

  ءبىرىنشى توقساندا بۇكىل ەل بويىنشا تۇرعىنداردىڭ جان باسىندىق قولداعى تابىسى 8493 يۋاندى قۇراپ، ناق %6.8 ارتىپ، بىلتىرعى سايكەس مەزگىلدەگىدەن 0.2 پايىز تەزدەپ، GDPنىڭ ارتۋ جىلدامدىعىنان استى.

  ءبىرىنشى توقساندا جەكەلەر تابىس باجى رەفورماسىندا جالپى 168 ميلليارد 600 ميلليون يۋان باجى ازايتىلىپ، جان باسىنا ورتا ەسەپپەن 855 يۋان ازايتىلدى.

  توزىمدىلىك تاماشا مەجەدە مىقتاپ بەكەمدەلدى −

  تاياۋدا حالىقارالىق اقشا قورى ۇيىمى بيىلعى جۇڭگونىڭ ەكونوميكالىق ارتۋى مەجەسىن 0.1 پايىزدان %6.3 كە دەيىن جوعارىلاتتى.

  ءبىرىنشى توقساندا تۇتىنۋشىلاردىڭ سەنىم كورسەتكىشى بىلتىرعى ءتورتىنشى توقسانداعىدان 3.2 پايىز ارتتى.

  تۇراقتى ساندى مالىمەتتەردىڭ استارىنا ۇڭىلسەك، جۇڭگونىڭ ەكونوميكالىق دامۋىنىڭ مەجەلىك جاقسارۋى مەن سەنىمىنىڭ ارتۋى تىپتەن قىمباتتى بولا تۇسكەنىن بايقايمىز.

  مەملەكەتتىك دامۋ جانە رەفورما كوميتەتىنىڭ اقپارات مالىمدەمەشىسى يۋان دا بىلاي دەدى: ”ءبىرىنشى توقساندا ەكونوميكانىڭ ارتۋىنىڭ نىق قاداممەن باستالۋى تۇتاس جىلداعى اۋقىمعا جاقسى نەگىز قالادى، ءبىز بيىلعى ەكونوميكالىق، قوعامدىق دامۋدىڭ كوزەۋلى نىسانالارىن جۇزەگە اسىرۋعا تولىق سەنىمدىمىز، وعان شارت - جاعدايىمىز، قابىلەتىمىز جەتەدى“.

  پارتيا ورتالىق كوميتەتىنىڭ پارمەندى باسشىلىعىندا، قۋاتتى ەل ءىشى بازارى مىعىم نەگىز قالاپ، قامداۋ جاعىنداعى قۇرىلىمدىق رەفورمانىڭ ىشكەرىلەي ىلگەرىلەتىلۋى جاڭا قوزعاۋشى كۇش ازىرلەپ تۇرعاندا، جۇڭگو ەكونوميكاسىنىڭ بولاشاعىنان ءۇمىت زور.

  ”ەلىمىز ەكونوميكاسى قازىرگى كەزدە باسەڭدەۋ قىسىمىنا ءدوپ كەلگەنىمەن، ءبىراق ەكونوميكالىق دامۋدىڭ ۇزاق ۋاقىتتىق جاقسارۋى، نەگىزىنەن العاندا، وزگەرگەن جوق“. بەيجيڭ داشۋەسى گۋاڭحۋا باسقارۋ شۋەيۋانىنىڭ قۇرمەتتى باستىعى لي ينيڭ بىلاي دەدى: ءبىز سەنىمدى بەكەمدەپ، ىشكى قوزعاۋشى كۇشتى قاۋلاتىپ، جوعارى ساپالى دامۋدى ىلگەرىلەتۋدەن جازباي، دامۋ بارىسىندا سىن - سايىستاردى قارسى الىپ، وزگەرىس بارىسىندا ورايدى يگەرۋىمىز كەرەك.

  - الەۋەتتىلىككە ۇڭىلسەك − قوزعاۋشى قۋات جەدەل اۋىسىپ، ومىرشەڭدىك قاۋلادى

  سىچۋان، حۋنان، فۋجيان، چۇڭچيڭ، گۋاڭشي قاتارلى كوپتەگەن ولكەلەردىڭ ساياحات تابىسى 10 ميلليارد يۋاننان استى؛ كينو بەلەتىنىڭ ساتىلىمى ءبىر ميلليارد 500 ميلليون يۋاننان اسىپ، ”1 - مامىر“ كەزىندەگى كينو بەلەت ساتىلىمىنىڭ جاڭا رەكوردىن جاڭالادى؛ اس - سۋ، اۆتوموبيل ونىمدەرى سياقتى تۇتىنۋلار ايتاقالسىن ءوستى...

  ەندى عانا اياقتاعان ”ۇزارتىلعان نۇسقاداعى“ دەمالىستا كوپتەگەن ادام كولىك كەپتەلىسىن، كورىنىس تۇيىندەرىندە ادامداردىڭ كوپتىگىن ايتىپ نازالانسا دا، بازار ماماندارى بۇدان جۇڭگو ەكونوميكاسىنىڭ وراسان زور الەۋەتتىلىگىن بايقادى.

  وراسان زور الەۋەتتىلىك ءبىر ميلليارد 400 ميلليون حالىقتىڭ ىشىندە دۇنيە ءجۇزى بويىنشا كولەمى ەڭ كەڭ ورتا تابىستىلار توبىنىڭ ۇزدىكسىز جاڭارعان جويقىن تۇتىنۋ سۇرانىسىندا جاتىر.

  38 تريلليون يۋان، بۇل 2018 - جىلعى جۇڭگو تۇتىنۋ بازارىنىڭ كولەمى. بۇل كولەم دۇنيە ءجۇزى بويىنشا الدىڭعى قاتاردا، سونداي - اق ول ۇزدىكسىز ءبىرشاما جىلدام قارقىنمەن ۇلعايۋدا. ”كۇللى دۇنيە جۇڭگولىقتاردىڭ تۇتىنۋ اۋقىمىنا نازار سالۋدا“ دەلىندى «جاپونيا ەكونوميكالىق حابارلار» سايتىنىڭ ماقالاسىندا.

  مەملەكەتتىك ساناق مەكەمەسىنىڭ دەرەكتەرىندە كورسەتىلۋىنشە، بيىل ءبىرىنشى توقساندا سوڭعى تۇتىنۋ شىعىسىنىڭ GDPنىڭ وسۋىنە قوسقان ۇلەس مولشەرى %65.1كە جەتىپ، ۇزدىكسىز تۇردە ەكونوميكالىق ارتۋدىڭ باستى قوزعالتقىشى بولعان.

  وراسان زور الەۋەتتىلىك تۇرلەنۋدىڭ، جاڭارۋدىڭ كوبەيتكىش اسەرىندە جاتىر.

  بازار ەكونوميكاسى بەينە قۇمنان التىن شايقاعان سياقتى. جۇڭگو جاساۋ كاسىبىنىڭ تەرەڭ نەگىزىنە جانە وراسان زور بازار سۇرانىسىنا تامىر تارتقان جۇڭگو كاسىپورىندارى ءاربىر ناقتى سالادا دەن قويا، شوگەلدىكپەن ىستەپ، جەدەل جەتىلىپ، جاڭالىق اشۋ ارقىلى دامۋعا دەم بەرۋدىڭ اتويشىلارىنا اينالدى.

  دەرەكتەردە كورسەتىلۋىنشە، 2018 - جىلى جۇڭگونىڭ سيفرلى ەكونوميكاسىنىڭ كولەمى 31 تريلليون 300 ميلليارد يۋانعا، GDPدەن ۇستاعان ارا سالماعى %34.8كە جەتكەن؛ جۇڭگونىڭ جاڭالىق اشۋ كورسەتكىشى الەمدىك قاتاردا 17 - ورىنعا كوتەرىلگەن. بيىل ءبىرىنشى توقساندا جوعارى تەحنيكالىق كاسىپتەردىڭ، ستراتەگيالىق جاڭا وركەندەگەن كاسىپتەردىڭ قوسىلعان قۇنىنىڭ ارتۋ قارقىنى كولەمدەنگەن ونەركاسىپتىڭ جالپىلىق ارتۋ قارقىنىنان ۇزدىكسىز جوعارى بولعان.

  ”تەحنيكالىق سالالارداعى سەرىكتەستىكتەر باس بولعان جۇڭگونىڭ جاڭا ءداۋىر سەرىكتەستىكتەرى دۇنيە جۇزىندەگى 2 - ۇلكەن ەكونوميكالىق تۇلعانىڭ ارتۋىن اۋقىمدى دەڭگەيدە ىلگەرىلەتۋدە“ دەپ اتاپ كورسەتىلدى بلۋمبەرگ حابار اگەنتتىگىنىڭ سايتىندا، - ”جۇڭگو ۇكىمەتىنىڭ ساياساتى بۇل بەتالىستى كۇشەيتە تۇسۋدە“.

  وراسان زور الەۋەتتىلىك سايكەسە دامىعان ۇلكەن اۋقىمدا جاتىر.

  بىرتىندەپ كەڭەيە تۇسكەن وڭىرلەردىڭ سايكەسە دامۋ اۋقىمى، ۇزدىكسىز ىلگەرىلەگەن قالا - قالاشىقتانۋ ءۇردىسى، گۇلدەنىپ كەلە جاتقان اۋىل - قىستاقتىڭ دامۋى... ۇزدىكسىز ارىنداعان، كەڭەيتىلگەن جانە تەرەڭدەتىلگەن وڭىرلىك كەڭىستىكتەر جۇڭگو ەكونوميكاسىنىڭ دامۋ تامىرىنىڭ اناعۇرلىم قۋاتتى سوعۋىنا، اياق الىسىنىڭ اناعۇرلىم ورنىقتى بولۋىنا مۇمكىندىك جاسادى.

  جۋىقتا «جۇڭگو كوممۋنيستىك پارتياسى ورتالىق كوميتەتىنىڭ، مەملەكەتتىك كەڭەستىڭ قالا، اۋىلدى توعىستىرا دامىتۋ ءتۇزىلىس - مەحانيزمىن جانە ساياسات جۇيەسىن ورناتۋ، كەمەلدەندىرۋ جونىندەگى پىكىرى» جاريالاندى.

  ادامدى وزەك ەتكەن جاڭاشا قالا - قالاشىقتاندىرۋ مەن اۋىل - قىستاقتى گۇلدەندىرۋدى قاتار ىلگەرىلەتىپ، قالا مەن اۋىلدىڭ توعىسپالى دامۋىن ونان ارى جەبەۋ − كەزەكتەگى قوعامداعى باستى قايشىلىقتى شەشۋدىڭ شەشۋشى تۇتقاسىنا، وسىزامانداندىرۋدى ىلگەرىلەتۋدىڭ ماڭىزدى بەلگىسىنە، دامۋ كەڭىستىگىن كەڭەيتۋدىڭ قۋاتتى قوزعاۋشى كۇشىنە اينالدى.

  بيىل جىل باسىنان بەرى، بەيجيڭدى، تيانجيندى، حىبەيدى سايكەستىرە دامىتۋ، چاڭجياڭ ەكونوميكالىق بەلدەۋىن دامىتۋ، گۋاڭدۇڭ - شياڭگاڭ - اۋمىن ۇلكەن شىعاناق رايونى قۇرىلىسى، چاڭجياڭ اتىراۋى ءوڭىرىن ءبىر تۇلعالاندىرىپ دامىتۋ ۇزدىكسىز ىلگەرىلەپ، وڭىرلەر سايكەسە دامىعان تىڭ تەبىن كورسەتتى.

  شىعىس بولىكتەگى وڭىرلەر ۇزدىكسىز تۇرلەنىپ، جاڭارىپ، ورتا، باتىس بولىكتەگى وڭىرلەر جەدەل ارتىپ، شىعىس سولتۇستىك وڭىرلەر تۇراقتىلىققا بەت الىپ، قايتا ءوسىپ، 4 ۇلكەن وڭىرلىك بولىك ۇتىمدى ىقپالداسىپ، تۇرلەنۋ، جاڭارۋ ۇزدىكسىز ىلگەرىلەدى.

  يسپانيانىڭ «ABC گازەتىنىڭ» سايتىندا بىلاي باعا بەرىلدى: قالا - قالاشىقتانۋ ءۇردىسى، ساتىپ الۋ قۋاتىنىڭ ءوسۋى، سونداي - اق وعان سايكەس تۋىنداعان ساپالى ونىمدەر مەن قىزمەت وتەۋلەر سۇرانىسى جانە بولشەك ساتۋ كاسىبىنىڭ دامۋى، مىنە وسى فاكتورلار جۇڭگو ەكونوميكاسىنىڭ تۇرلەنۋىنىڭ بوگەۋ بەرمەس ارىنعا يە بولۋىنا مۇمكىندىك جاسادى.

  - تاباندىلىققا ۇڭىلسەك − رەفورمانى تەرەڭدەتۋگە تاباندى بولىپ، ەسىك اشۋدى ۇزدىكسىز كەڭەيتتى

  5 - ايدىڭ 7 - كۇنى جۇڭگو حالىقارالىق ەكونوميكالىق اۋىس - ءتۇيىس ورتالىعى سياقتى قۇرىلىمدار بىرلەسىپ جاريالاعان «”ءبىر بەلدەۋ، ءبىر جول“ ساۋدا - قارجى قوسۋ كورسەتكىشى» بايانداماسىندا كورسەتىلۋىنشە، 2013 - جىلدان 2018 - جىلعا دەيىن، جۇڭگونىڭ ”ءبىر بەلدەۋ، ءبىر جول“ بويىنداعى ەلدەرمەن تاۋار ساۋداسىنىڭ جالپى سوماسى 6 تريلليون دوللاردان اسىپ، ”ءبىر بەلدەۋ، ءبىر جول“ بويىنداعى 25 ەلدىڭ ەڭ ۇلكەن ساۋدا سەرىكتەسىنە اينالعان.

  ”جۇڭگو ’ءبىر بەلدەۋ، ءبىر جول‘ ساۋداسىنىڭ ارتۋىن جەتەكتەگەن باستى قوزعاۋشى كۇشكە اينالدى“، - دەيدى جۇڭگو حالىقارالىق ەكونوميكالىق اۋىس - ءتۇيىس ورتالىعى امەريكا قۇراما شتاتتارى جانە ەۆروپا زەرتتەۋ ورنىنىڭ جەتەكشى اعا زەرتتەۋشىسى جاڭ مونان.

  اناعۇرلىم كەڭ سالادا شەتەل قارجىسىنىڭ بازارعا كىرۋىنە رۇقسات بەرۋدى كەڭەيتۋ، ءبىلىم مەنشىك ۇقىعىن قورعاۋ بويىنشا حالىقارالىق سەلبەستىكتى اناعۇرلىم زور سەرپىنمەن كۇشەيتۋ، تاۋار مەن قىزمەت وتەۋ يمپورتىن اناعۇرلىم كەڭ كولەمدە ۇلعايتۋ، حالىقارالىق ماكرولىق ەكونوميكالىق ساياساتتاردى سايكەستىرۋدى اناعۇرلىم ءونىمدى اتقارۋ، سىرتقا ەسىك اشۋ ساياساتىنا اناعۇرلىم ءمان بەرۋ ساياساتتارى دايەكتىلەندى، تياناقتاندى...

  جۋىقتا وتكىزىلگەن 2 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىنىڭ اشىلۋ سالتىندا جۇڭگو ءبىرسىپىرا كەلەلى رەفورما، ەسىك اشۋ شارالارىن جاريالادى.

  زالدا وتىرعان نەشە 10 مەملەكەتتىڭ باسشىلارى، باستى حالىقارالىق قۇرىلىمداردىڭ جاۋاپتىلارى جانە ءار سالادان كەلگەن سيلى قوناقتار مۇقيات قۇلاق ءتۇرىپ، ءالسىن - ءالسىن دۋ قول شاپالاق سوقتى.

  ”جۇڭگونىڭ ىشكەرىلەي رەفورما جاساۋ، ەسىك اشۋ جونىندەگى كەلەلى شارالارى دۇنيە جۇزىنە تۇراقتىلىق، سەنىم جانە ءۇمىت سيلادى“، - دەدى بىرلەسكەن مەملەكەتتەر ۇيىمىنىڭ باس حاتشىسى گۋتتەررەس.

  ەفيوفيانىڭ زۇڭليى ابي تەبىرەنە بىلاي دەدى: جۇڭگونىڭ تابىسقا جەتۋى − ۇزدىكسىز رەفورما جاساۋدىڭ، ەسىك اشۋدىڭ قۇدىرەتتى ستراتەگيالىق تاباندىلىقپەن جانە ەرەن باسشىلىقپەن بىرىگىپ جاساعان حيميالىق رەاكسياسى. جۇڭگو ورتاعا قويعان ”ءبىر بەلدەۋ، ءبىر جول“دى بىرگە قۇرۋ باستاماسى پاراساتقا جانە بولجامپازدىققا تولى، ول اناعۇرلىم ءادىل، تۋراشىل حالىقارالىق ءتارتىپ ورناتۋعا ءتيىمدى بولىپ، اناعۇرلىم كوپ مەملەكەتكە، اسىرەسە، وركەندەپ كەلە جاتقان ەلدەرگە دامۋ ورايىن اكەلدى.

  رەفورما كىدىرمەيدى، ەسىك اشۋ توقتامايدى. بيىل جىل باسىنان بەرى، ”بەكەمدەۋ، كۇشەيتۋ، جوعارىلاتۋ، ىركىلىسسىزدەندىرۋ“دى ارقاۋ ەتكەن ەلىمىزدىڭ قامداۋ جاعىنداعى قۇرىلىمدىق رەفورماسى ۇزدىكسىز تەرەڭدەي ىلگەرىلەدى. بەلسەندى قازىنا ساياساتى كۇش ۇستەپ، ونىمدىلىكتى جوعارىلاتىپ، تۇراقتى اقشا ساياساتىنىڭ بەرىك - بوستىعى لايىقتى بولدى، ەلىمىز رەفورمانى تەرەڭدەتۋدە ساپانى جوعارىلاتۋعا اناعۇرلىم ءمان بەرىپ، بازار ومىرشەڭدىگىن قاۋلاتۋعا اناعۇرلىم ءمان بەرىپ، جوعارى ساپالى دامۋ بارىسىندا حاۋىپ - قاتەردەن اناعۇرلىم بايىپتىلىقپەن ساقتاندى جانە ونى جويدى.

  رەفورما جاساۋ، ەسىك اشۋ 40 جىلدان استام بوران - شاشىندى باستان كەشىرىپ، جاڭا داۋىردە ونان ارى جالىنداپ، جارقىراي ءتۇسىپ، جۇڭگونى دۇنيە ءجۇزى ەكونوميكاسىنىڭ ارتۋىنداعى ”ورنىقتىرعىش“، ”قوزعاۋشى كۇش قاينارى“ عانا ەمەس، دۇنيە ءجۇزى ەكونوميكاسىنىڭ قايتا جاندانۋىنىڭ ”قاتاڭ سۇرانىسىنا“دا اينالدىردى.

  اۋقىمدى باعامداي ءبىلۋ − پاراساتتىلىق، اۋقىمدى مەڭگەرە بىلگەن جەڭىسكە جەتەدى

  ءوز دامۋىنىڭ ىشكى سۇرانىسىنا سايكەسىپ، ادامزاتتىڭ تاعدىرلاس ورتاق تۇلعاسىن قۇرۋدىڭ ورتاق تىلەگىنە ۇيلەسە بىلگەندىكتەن دە، جۇڭگونىڭ رەفورمانى ۇزدىكسىز تەرەڭدەتۋ، ەسىك اشۋدى ۇزدىكسىز كەڭەيتۋ شارالارى الەمنىڭ جاپپاي ءۇن قوسۋىنا تۇرتكى بولدى.

  2018 - جىلى دۇنيە جۇزىندەگى مەملەكەت ارالىق قارجى قوسۋ %19 تومەندەدى، ءبىراق جۇڭگونىڭ ناقتى پايدالانعان قارجىسى 138 ميلليارد 300 ميلليون دوللارعا جەتىپ، وركەندەپ كەلە جاتقان ەلدەر ىشىندە ماڭداي الدى ورىندى يەلەدى، تۇتاس جىلدا شەتەل قارجىلاندىرىپ جاڭادان قۇرىلعان كاسىپورىندار 60 مىڭنان اسىپ، %69.8 ءوستى. شەتەل ساۋداگەرلەرىنىڭ قارجى قوسۋ زاڭىن قاراپ ماقۇلداپ، پاتەنت زاڭىنا وزگەرىس ەنگىزىپ، اناعۇرلىم كەڭ كولەمدە سالىقتى ازايتىپ، اقىنى تومەندەتۋگە، ءادىل باسەكەلەسەتىن بازار ورتاسىن ورناتۋعا ۋادە بەردى... شەتەل ساۋداگەرلەرى قارجى قوساتىن سالالارعا تىكە باعىتتالعان ءبىرقاتار شەشۋشى شارالار دۇنيە جۇزىنە جۇڭگونىڭ ەسىك اشۋدى كەڭەيتەتىن بەكىمى مەن ارەكەتىن كورسەتتى.

  بيىل ءبىرىنشى توقساندا جۇڭگو ناقتى پايدالانعان شەتەل قارجىسى بىلتىرعى سايكەس مەزگىلدەن %6.5 ارتىپ، شەتەل كاسىپورىندارى ءوز ارەكەتتەرى ارقىلى جۇڭگو ەكونوميكاسىنا ”سەنىمدىلىك داۋىسى“ن بەردى.

  ۇلى اقيقات ۇستاعانعا ءدۇيىم جۇرت ۇييدى. اناعۇرلىم اشىق جۇڭگو دۇنيە جۇزىمەن اناعۇرلىم ۇتىمدى ىقپالداستىق قالىپتاستىرىپ، جۇڭگوعا جانە دۇنيە جۇزىنە اناعۇرلىم العا باسۋ جانە گۇلدەنۋ سيلايدى.

  (شينحۋا اگەنتتىگىنىڭ 5 - ايدىڭ 7 - كۇنى بەيجيڭنەن بەرگەن حابارى)

جاۋاپتى رەداكتور: ءاننا اكىمقان قىزى
  • الدا ايماعىمىزدىڭ تەمپەراتۋراسى كورنەكتى جوعارىلايدى
  • شي جينپيڭ مەن پىڭ لييۋان 2019 - جىلعى جۇڭگو بەيجيڭ دۇنيە جۇزىلىك باۋ - باقشا كورمەسىنە قاتىناسقان شەتەل جاقتىڭ باسشىلارىمەن جانە ولاردىڭ جۇبايلارىمەن بىرگە باۋ - باقشا كورمەسىن ەكسكۋرسيالادى
  • شي جينپيڭ 2019 - جىلعى جۇڭگو بەيجيڭ دۇنيە جۇزىلىك باۋ - باقشا كورمەسىنىڭ اشىلۋ سالتىنا قاتىناستى ءارى ماڭىزدى ءسوز سويلەدى
  • 2 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرى دوڭگەلەك ۇستەل باسشىلار ءماجىلىسىن وتكىزدى