اعاجاي-التاي تورابى   ›   مادەنيەت ارناسى   ›   مادەنيەت مايەگى

قوناق شاقىرعاندا نەنى ەسكەرۋ كەرەك؟

  ۇيدە قوناق كۇتۋ ۇلكەن جاۋاپكەرشىلىكتى تالاپ ەتەتىنى راس. كەلگەن قوناعىڭىز ءوزىن جايلى سەزىنىپ، ريزا بولىپ كەتۋ ءۇشىن نە ىستەۋ كەرەك؟ مۇندايدا كۇتىپ الاتىن ءۇي يەسى مەن ونىڭ ارەكەتتەرىنە كوپ نارسە بايلانىستى.

  ۇيىمىزگە قوناقتاردى ءبىز ءتۇرلى سەبەپتەرمەن مەيرامداردا، مەرەي توي، تۋعان كۇن دەگەن سياقتى اتاۋلى كۇندەردە نەمەسە جاي كەزدەسىپ، اڭگىمەلەسىپ قايتۋعا شاقىرامىز. سەبەبىنە بايلانىستى قوناقتاردى دا سوعان ساي شاقىرۋ كەرەك.

  ەگەر ۇلكەن توي بولسا، وندا ارنايى شاقىرۋ بيلەتتەرىن جىبەرەدى، ال وتباسىلىق كىشىگىرىم وتىرىستارعا قوناقتاردى اۋىزشا، تەلەفونمەن دە شاقىرۋعا بولادى. قوناقتارعا دا دايىندىققا ۋاقىت بەرىپ، الدىن الا شاقىرعان ابزال. سوندىقتان، مىسالى، ۇيلەنۋ تويعا بەلگىلەنگەن تويعا دەيىن ءبىر اي بۇرىن شاقىرادى، ال تۋعان كۇن نەمەسە وتباسىلىق مەيرامدارعا ءبىر-ەكى اپتا بۇرىن.

  قوناق شاقىرار الدىندا، كەزدەسۋ ۋاقىتىن قاي ۋاقىتقا بەلگىلەۋدى انىقتاپ الۋ كەرەك. قوناق كۇتۋ ۋاقىتى تاماق ءىشۋ مەزگىلىنە تۇسپا-تۇس كەلگەنى ابزال. ەتيكەت ەرەجەلەرىنە ساي، قوناقتاردى تاڭعى اسقا، ياعني ساعات 10 مەن 12 ارالىعىندا، تۇسكى اسقا ساعات 15 پەن 19 اراسىندا، كەشكى اسقا ساعات 19 بەن 22 اراسىندا شاقىرۋ كەرەك. ەگەر "تولىققاندى" وتىرىس جاساۋ ويىڭىزدا بولماسا، وندا شاي مەن كوفەگە ساعات 17 مەن 19 اراسىندا شاقىرۋعا بولادى.

  سونىمەن، كەزدەسۋ ۋاقىتى بەلگىلەندى، قوناقتار شاقىرىلدى. ەندى ءۇيدى دايىنداپ، قوناقتاردى قارسى الۋ، ولاردى مەرەكەلىك داستارقانعا جايعاستىرۋ، مەرەكەلىك داستارقاندى جابدىقتاۋ، كوڭىل كوتەرۋ باعدارلامالارىن ۇيىمداستىرۋ، وتىرىستا ايتىلاتىن اڭگىمەلەردى ويلاستىرۋ، قوناقتاردى شىعارىپ سالۋ دەگەن سياقتى قوناق كۇتۋ ەرەجەلەرىن ەسكە الۋ عانا قالدى.

  قوناق كۇتكەندە ءۇي يەلەرى ادەمى كيىنىپ، كوڭىلدى شىراي تانىتىپ، مەرەكەلىك كوڭىل-كۇيدە، نۇر شاشىپ ءجۇرۋى ءتيىس. ەگەر قوناق قوجايىندارعا سىيلىق الىپ كەلسە، ولار ونى قۋانىشپەن قابىل الىپ، مىندەتتى تۇردە ريزاشىلىعىن ءبىلدىرۋى قاجەت. سىيلىقتى سول جەردە اشىپ كورۋگە دە بولادى. ءبىراق سىيلىقتى قالعان قوناقتارعا كورنەكى تۇردە كورسەتۋ ادەپسىزدىك سانالادى.

  قوناقتارعا ءۇي شاركەسىن ۇسىنۋ مىندەتتى ەمەس، الايدى بۇگىندە بۇل ارەكەت كەڭ جايىلىپ كەتتى. سوندىقتان ەگەر شاركەي ۇسىناتىن بولساڭىز، شاركەيلەرىڭىز تازا، جيناقى بولسىن.

  كەلەسى كەزەڭ ـــ قوناقتاردى داستارقانعا جايعاستىرۋ. قوناقتاردى جايعاستىرعاندا ۇلكەن ادامداردى تورگە شىعارىپ، سونىمەن قاتار كورشىلەر ءبىر-بىرىمەن ورتاق اڭگىمە تابا الاتىنىن ەسكەرىپ، ەرلى-زايىپتىلاردى بىرگە وتىرعىزۋدى ويلاستىرۋ كەرەك.

  قوناقتاردى تولىق جابدىقتالعان، دايىن ۇستەلگە وتىرعىزۋ شارت. داستارقان مەن مايلىق تا تازا، ادەمى ارلەنگەن بولۋى قاجەت.

  وتىرىس كەزىندە قوناقتارعا تاماق جە دەپ ۇسىنۋعا بولادى، ءبىراق ماجبۇرلەمەۋ كەرەك. قاندايدا ءبىر تاعامنان باس تارتسا، دەمەك ءوز قالاۋى جانە ونى ۇسىنا بەرمەۋ كەرەك جانە ءۇي يەلەرى قوناقتارىنىڭ جايلى وتىرىپ، تويىمدى تاماق ءىشىپ، ادەمى اڭگىمە ايتىپ قايتۋىنا بار جاعدايدى جاساۋىن كاپەرىندە ۇستاۋ قاجەت.

  وتىرىس كەزىندە اڭگىمە لەگىن ءۇي قوجايىنى باسقارادى. ءۇي يەلەرى قىزىقتى اڭگىمەلەردى دەمەپ جىبەرىپ، قاۋىپتى تاقىرىپتاردىڭ ءوربۋىنىڭ الدىن الىپ، كەي قوناقتاردىڭ وتكىر مالىمدەمەلەرىن جۇمسارتىپ جىبەرۋلەرى مىندەتتى. مەرەكە، مەيرام بولعاندىقتان، سوعان ساي جايدارى اڭگىمەلەر ايتىلۋىن قامتاماسىز ەتۋى كەرەك. سونىمەن قاتار قوجايىندار قوناقتارىنا ونىمدەردىڭ قىمباتتاعانىن، دەنساۋلىقتارىنا شاعىمدانىپ، وتباسىلىق ماسەلەلەرىن ايتپاۋى ءتيىس.

  وتىرىس اياقتالۋعا جاقىنداعاندا، قوناقتار كەتۋگە جينالا باستايدى. ءۇي يەلەرى قوناقتاردى تەزىرەك شىعارىپ سالۋعا ىنتالانباۋ كەرەك، تەك بەلگى بەرسە بولادى. مىسالى، شاي ۇسىنۋ وتىرىس اياقتالۋعا جاقىن ەكەنىن بىلدىرەدى. ەگەر قوناقتاردىڭ دەرلىگى كەتىپ، بىرەن-ساراڭ ادام قالسا، قوجايىندار ولاردىڭ كوزىنشە ءۇي جيناۋدى باستاماۋ كەرەك، ونى تەك بارلىق قوناقتاردى شىعارىپ سالعان سوڭ عانا ىسكە اسىرادى.

  بايقاعاندارىڭىزداي، قوناق كۇتۋدىڭ نەگىزگى ەرەجەلەرى اسا قيىن ەمەس جانە ىسكە اسىرۋعا وڭاي. قوناق كۇتۋگە سالعىرت قاراماي، اسا دايىندىقپەن كەلسەڭىز، وندا كەش قىزىقتى ءوتىپ، دوس-جاراندارىڭىز ريزا بولىپ قايتادى جانە ءوزىڭىز دە قوناق شاقىرۋدان ءلاززات الاسىز.

جاۋاپتى رەداكتور: ءاننا اكىمقان قىزى
  • شي جينپيڭ مەن پىڭ لييۋان 2019 - جىلعى جۇڭگو بەيجيڭ دۇنيە جۇزىلىك باۋ - باقشا كورمەسىنە قاتىناسقان شەتەل جاقتىڭ باسشىلارىمەن جانە ولاردىڭ جۇبايلارىمەن بىرگە باۋ - باقشا كورمەسىن ەكسكۋرسيالادى
  • شي جينپيڭ 2019 - جىلعى جۇڭگو بەيجيڭ دۇنيە جۇزىلىك باۋ - باقشا كورمەسىنىڭ اشىلۋ سالتىنا قاتىناستى ءارى ماڭىزدى ءسوز سويلەدى
  • 2 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرى دوڭگەلەك ۇستەل باسشىلار ءماجىلىسىن وتكىزدى
  • شي جينپيڭ 2 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىنىڭ اشىلۋ سالتىنا قاتىناستى ءارى ارقاۋ ءسوز سويلەدى