اعاجاي-التاي تورابى   ›   مادەنيەت ارناسى   ›   ونەگە

كەشىرىم — كوڭىلدىڭ كەڭدىگى

  كەشىرىم ــ ادىلدىكتى اڭسايتىن جاندار ءۇشىن ۇشى مەن قيىرى كورىنبەيتىن نۋ ورمان سەكىلدى. جامان ءىسى ءۇشىن جاۋاپ بەرمەي كەتەتىندىگىنىڭ ءوزى جانعا جارا سالادى. ءبىز بارلىعىنىڭ ءادىل بولعانىن، اركىمنىڭ سىباعاسى وزىنە تيگەنىن قالايمىز. ءبىز سەزىنگەن ساتقىندىق سەزىمىن ولار دا سەزىنسە ەكەن دەيمىز. ءبىراق... وسىنىڭ بارلىعى دۇرىس پا؟ ءبىر ساتكە ويلانىپ كورىڭىزشى. مۇنىڭ كىمگە پايداسى بار؟

  وزگەنى كەشىرۋ وزىمىزگە ساتقىندىق جاساپ، رۋحاني قۇندىلىقتارىمىزدى اياق استى ەتكەندەي بولىپ كورىنۋى مۇمكىن. ادىلدىك ءۇشىن كۇرەستە جەڭىلگىڭىز كەلمەيتىنىن جاقسى تۇسىنەمىز. اشۋ وتى ىشىڭىزدە الاۋلاپ جانىپ، ءسىزدى ءوزىنىڭ ۋىمەن ۋلاندىرىپ جاتىر. وسىنى سەزسەڭىز دە، ءبارىن ۇمىتا المايسىز. اشۋ مي مەن جۇرەگىڭىز سەكىلدى دەنەڭىزدىڭ اجىراماس بولىگىنە اينالعانداي. ءيا، بۇل سەزىم كوبىمىزگە تانىس.

  ءبىز قاي كەزدە اشۋلانامىز؟ ادىلدىكتى تالاپ ەتكەن كەزدە اشۋلانامىز. اشۋلانعان سايىن تاۋ مەن تاستى قوپارىپ، كوپ ءىس جاساپ جۇرگەندەي كورىنۋى مۇمكىن. ال اشۋ بولعان ءىستى قايتا قالپىنا كەلتىرۋ مۇمكىن ەمەستىگىن تۇسىنبەيدى. كەككە ۇلاسادى.

  اشۋعا بوي الدىرۋ ــ جارانىڭ ورنى قالىپ قالماسىن دەگەن ويمەن ونى قايتا-قايتا قاناتۋمەن بىردەي. قۇددى ءسىزدى رەنجىتكەن ادام قايتىپ كەلىپ، جاراڭىزدى قايتا ەمدەپ بەرەتىندەي. ال اشۋدىڭ باستى سەبەبى – ەمدەلۋدەن باس تارتۋ. ويتكەنى جارا جازىلعان سوڭ، ءسىز باسقا تەرىمەن ءومىر سۇرۋگە ءماجبۇرسىز. ءسىزدىڭ قالايتىنىڭىز باسقا نارسە: بارلىعى بۇرىنعىداي بولسىن دەگەن وي.

  ىشتەگى اشۋىڭىز قىز-قىز قايناپ جاتقان كەزدە كەشىرىم تۋرالى ءسوز قوزعاۋدىڭ ءوزى ورىنسىز سياقتى. اقىلىڭىز كەشىرىمنىڭ دۇرىس شەشىم ەكەنىن تۇسىنەدى. كەشىرگەن سوڭ ورنايتىن تىنىشتىق پەن بەيبىت ءومىردى اڭسايدى. وكىنىشكە وراي، سابىرلىق تانىتۋ وتە قيىن.

  وسى كۇنگە دەيىن كەشىرىم سۇراۋ مەن كەشىرىمنىڭ ەشنارسە وزگەرتپەيتىنىن ەشكىم ايتپاعان. ول بولعان وقيعانى جادىمىزدان ءوشىرىپ تاستايتىن وشىرگىش ەمەس. ول جۇرەگىمىزدىڭ سىزداپ اۋىرعانىن توقتاتا المايدى. ياعني باستىسى، سىرتتاي ەمەس، ىشتەي كەشىرۋ مەن كەشىرىم سۇراۋ.

  بىرەۋدى كەشىرگەن كەزدە ەشبىر تاڭعاجايىپتىڭ ورىن المايتىندىعىن مويىنداپ، بارىنەن باس تارتاتىنداي كورىنەسىز. ءيا، قۇيىننىڭ ورىنسىز كەلگەنى راس، ءبىراق بۇزىلعان قالادا تۇرماسقا امالىمىز جوق. ەشبىر اشۋ مەن كەك سول قالانى قالپىنا كەلتىرە المايدى.

  كەشىرىم – قايتا قالپىنا كەلىپ جاتقان دۇنيەلەر ءۇشىن جاۋاپكەرشىلىكتى مويىنعا الۋ. ياعني جان تىنىشتىعىنا ءبىر قادام جاقىنداي ءتۇسۋ.

  كەشىرىم ءسىزدى رەنجىتكەن ادامنىڭ جامان ارەكەتىنە كوز جۇما قاراعاندىعىڭىزدى بىلدىرمەيدى. مۇنىمەن قاتار، ولارمەن قايتا ءتىل تابىسىپ، تاتۋلاسۋىڭىز كەرەكتىگىن دە مەڭزەمەيدى. بار بولعانى ولاردىڭ جان-دۇنيەڭىزگە ايىقپاس جارا سالىپ كەتكەنىن بىلە تۇرا سول جارامەن ارى قاراي دا ءومىر سۇرە الاتىندىعىڭىزدى مويىنداۋ. رەنجىتكەن ادامىڭىز كەلىپ كەشىرىم سۇرايدى دەگەن ويدان ارىلۋ.

  كەشىرىم – بۇل ادىلەتسىزدىك ەمەس. ول ءسىزدىڭ جەڭىلىس تاپقاندىعىڭىزدى ەمەس، كەرىسىنشە رۋحىڭىزدىڭ مىقتى ەكەنىن بىلدىرەدى. ادامدى كەشىرۋ، كەشىرمەۋ - تەك ءوزىڭىزدىڭ قولىڭىزداعى دۇنيە. ءبىز بار بولعانى الداعى ومىرىڭىزدە جولىڭىز بولسىن دەيمىز!

جاۋاپتى رەداكتور: ءاننا اكىمقان قىزى
  • الداعى ءۇش كۇندىك اۋا رايىنان الدىن الا مالىمەت
  • شي جينپيڭنىڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋدەن جازباي، ساياسي قاسيەت پەن توڭكەرىستىك رۋحتى ماڭگى ساقتاپ، تانىم مەن ارەكەتتى بىرلىككە كەلتىرىپ، ىرىقتىلىقپەن جاۋاپكەرشىلىك ارقالاپ، ىسكەرلىك كورسەتەيىك
  • لي كىچياڭ زۇڭلي مەملەكەتتىك ەكى ماجىلىسكە تىلشىلىك ىستەگەن جۇڭگولىق، شەتەلدىك تىلشىلەرمەن كەزدەستى ءارى سۇراۋلارىنا جاۋاپ بەردى
  • 13 - كەزەكتى مەملەكەتتىك حالىق قۇرىلتايىنىڭ 2 - ءماجىلىسى بەيجيڭدە جابىلدى