اعاجاي-التاي تورابى   ›   مادەنيەت ارناسى   ›   بىلگەنگە مارجان

ادامدار نەگە ۇرسىسادى؟

  الەمدە ءبىر رەت بولسىن ۇرسىسپاعان ادام جوق شىعار. ۇرىس-كەرىس سياقتى جاعىمسىزدىقتان الشاق بولۋ ءۇشىن بارىنشا تىرىسۋ كەرەك، سەبەبى ونىڭ پايدا بولۋىنا سەبەپ تولىپ جاتىر. ونىڭ الدىن الۋ ءۇشىن ادامداردىڭ ءبىر-بىرىمەن نەگە ۇرسىساتىندىعىن انىقتاپ العان ءجون.

  بۇل اقپارات ءسىز بەن جاقىن ادامدارىڭىزدىڭ اراسىندا كەلىسپەۋشىلىك تۋىنداماس ءۇشىن قاجەت بولادى.

   ادامدار وعان باسقالار كوڭىل بولمەگەندىكتەن ۇرسىسادى

  كەي ادامدارعا باسقالار ونى ەلەمەيتىن، ەستىمەيتىن جانە تۇسىنگىسى كەلمەيتىن سەكىلدى كورىنەدى. ولار ءوزىن جامان سەزىنىپ، ابدەن شارشاپ، قولداۋ كۇتىپ، ءبىراق ونى الا الماسا، جانىنداعىلاردىڭ ونىڭ ماسەلەسىن نەگە كورە المايتىندىعىن ويلاپ، جۇكتى جالعىز كوتەرە الماي قينالادى. ونىڭ ماسەلەسى باسقاعا تۇككە تۇرمايتىن سەكىلدى كورىنگەنىمەن، ول ءۇشىن وتە ماڭىزدى. ول باسقالارىنىڭ ءوزىن ەستىگەنىن قالايدى. ءبىراق ەشكىمنەن كومەك سۇرامايدى. باسقالار وعان قاراپ-اق ءبىلۋ كەرەك دەپ سانايدى. وسىنىڭ بارلىعى جينالىپ، بولىپ جاتقان نارسەگە تۇك قاتىسى بولماسا دا، اشۋعا بەرىلەدى. سول كەزدەگى ۇرىستىڭ سەبەبى كەز كەلگەن ۇساق-تۇيەك بولۋى مۇمكىن. ءبىراق ونىڭ نەگىزىن ىشتەگى رەنىشتەر قۇرايدى.

  ايقاي ەستىگەن ادام نە بولعانىن تۇسىنبەي قالۋى دا مۇمكىن. نە ىستەپ قويعانىن بىلمەي، ونىڭ "قورعانىش رەاكتسياسى" قوسىلىپ، ول دا ۇرسىسا كەتەدى. سوندىقتان، ءوزىڭىزدى ىشتەي ۋايىمداتىپ جۇرگەن نارسەلەردى جاقىنىڭىزعا ەركىن ايتىپ، قولداۋ سۇراۋدان ۇيالماۋ كەرەك. ال ەگەر سىزدەن بىرەۋ كومەك سۇراسا، ونىڭ ماسەلەسىنە تۇككە تۇرمايتىن نارسەدەي قاراماي، قولىڭىزدان كەلگەنشە قولداۋ كورسەتىڭىز. ايەلدەردىڭ كوپشىلىگىنە جاي جىلى قولداۋ سوزدەرىنىڭ ءوزى جەتكىلىكتى.

  ادامدار ماحابباتتىڭ جوقتىعىنان ۇرسىسادى

  ماحاببات ءسونىپ قالعان جەردە نەمەسە ەشقاشان بولماعان جەردە سەرىگىنىڭ وتىنىشىنە نەمقۇرايلىق ءبىلدىرۋ ءجيى كەزدەسەدى. نەمقۇرايلىق ادامنىڭ جانىن قينايدى. سونىڭ سەبەبىنەن ادام ءوزىن جامان سەزىنەدى، ونى ەشكىم قۇرمەتتەمەيتىن، تۇسىنبەيتىن، جاقسى كورمەيتىندەي كورىنەدى. مۇنداي ادام ۇندەمەۋگە تىرىسىپ، ەشتەڭە ايتپاي جۇرە بەرگەنمەن، ءبىر كۇنى "جاقسى ادام" بولۋدان، بىرەۋدىڭ كوڭىلىنەن شىعۋدان شارشاپ، ۇرىس-كەرىس باستالادى.

  ادامدار ءوز پىكىرىن قورعاۋ ءۇشىن ۇرسىسادى

  ءار ادام ءوز قۇندىلىعىن، ويىن جانە پىكىرىن دۇرىس دەپ سانايدى. اركىم ءوز ويىن قورعايمىن دەپ ءبىر-بىرىمەن سوزگە كەلەدى. وتە نامىسقور ادامدار ءوزىنىڭ كوزقاراسىن ۇستانۋمەن قاتار ونىمەن كەلىسپەيتىن اداممەن داۋلاسۋعا دەيىن بارىپ، اڭگىمەنىڭ سوڭى ۇرىسپەن اياقتالادى. ودان كەيىن ونىڭ كوڭىل كۇيى تۇسكەندىكتەن، تۇك قاتىسى جوق باسقا ادامدار دا زارداپ شەگەدى. مىسالى، ول كوڭىل كۇيى بولماعاندىقتان، سەبەپسىز ۇيدەگى جاقىندارىنا ايقايلاۋى مۇمكىن. ارينە، اركىمنىڭ ءوز ويى، پىكىرى بولعانى دۇرىس، ءبىراق باسقانىڭ دا كوزقاراسىن سىيلاۋدى ۇيرەنۋ كەرەك.

  ادامدار باسقانى دۇرىس تۇسىنبەگەندىكتەن ۇرسىسادى

  باسقالاردى تۇسىنبەۋ، تىڭداي الماۋ، تەك ءوز ءىسىن عانا ويلاۋ ۇرىس-كەرىستىڭ تاعى ءبىر سەبەبىنە جاتادى. بىرەۋلەر باسقانىڭ ارەكەتىن دۇرىس تۇسىنبەي قالادى نەمەسە باسقانىڭ ارەكەتىن تەك وزىنە بايلانىستى قابىلدايدى. نەگىزىندە، باسقا ادامداردىڭ ارەكەتى ەشتەڭە بىلدىرمەۋى مۇمكىن، سەبەبى ادامداردىڭ ءوز شارۋالارى جەتەرلىك.

  ءوزىن-ءوزى تومەن باعالايتىندىقتان ۇرسىسادى

  ادامدار ءوز-ءوزىن تومەن باعالاعاندىقتان جانە وزىنە دەگەن سەنىمسىزدىكتەن ءجيى ۇرسىسادى. ادامنىڭ ءوزىن-ءوزى باعالاۋى وتە تومەن بولسا، ول باسقالارعا قىزعانىشپەن قارايدى، وعان ءبارى مىندەتتى دەپ قابىلدايدى جانە رەنىشتەر ويلاپ تابادى. ال ونىڭ ءبارى جينالا بەرسە، ايقاي شىعارادى.

  ومىرىڭىزدە ۇرىستىڭ از بولعانىن قالاساڭىز، بولىپ جاتقان نارسەگە بايىپپەن قاراپ ۇيرەنىڭىز. بۇل باسقانىڭ ءسىزدىڭ قىزىعۋشىلىعىڭىزدى بۇزۋىنا كوز جۇمۋ دەگەن ءسوز ەمەس. ياعني، ءسىزدىڭ كوڭىلىڭىزدەن شىقپاعان زاتتى بىردەن ايتۋدى ادەتكە اينالدىرىڭىز. ءبىراق ايقايسىز، كەمسىتۋسىز، سابىرمەن ايتىڭىز. ەگەر ءوزىڭىزدى ۇستاۋ قيىنعا سوقسا، ۇرىستان جانە ونىڭ سالدارىنان الشاق بولۋ ءۇشىن الدىمەن كەتىپ قالىپ، بارلىق سەزىمىڭىزدى قاعازعا جازىپ الىڭىز. رەنجىتۋشى ادامعا نە ايتقىڭىز كەلەدى؟ فيزيكالىق قوزعالىس جاساڭىز. باستىسى، اشۋىڭىزدى باسا ءبىلۋىڭىز كەرەك، جاعىمدى نارسەنى ويلاڭىز. اشۋىڭىز باسىلعان سوڭ، بولعان جايتقا باسقا كوزقاراسپەن قاراپ كورىڭىز. سودان سوڭ عانا رەنجىتكەن ادامعا ونى كىنالاماي، تۇسىندىرە وتىرىپ، نەگە اشۋلانعانىڭىزدى ايتىڭىز. ءسىزدى قۇرمەتتەيتىن جانە باعالايتىن ادام ويىڭىزدى تىڭدايدى. كەي ادامدار ۇرسىسۋ ءۇشىن وزدەرى سەبەپ ىزدەپ تۇرادى. مۇنداي كەزدە ۇرىستان كەتىپ قالۋ ءۇشىن ناعىز تاپقىرلىق كەرەك بولادى. ايتپەسە، مۇنداي ادامدارمەن ارالاسا وتىرىپ، ءوز دەنساۋلىعىڭىز بەن جاقسى كوڭىل كۇيىڭىزدى قورعاۋ قيىنعا سوعادى. ءوز قارىم-قاتىناسىمىزدى باسقالارمەن سالىستىرۋدى قالاي دوعارامىز؟

جاۋاپتى رەداكتور: ءاننا اكىمقان قىزى
  • ورتالىقتىڭ قورشاعان ورتانى قورعاۋدى باقىلاۋ ـ تەكسەرۋدە اڭىس ەتكەن پىكىرلەرىن ناقتى رەتكە سالىپ تۇزەتۋگە كەپىلدىك ەتەيىك
  • بۋرىلتوعاي اۋدانى بالىق شارۋاشىلىعىن كۇش سالا دامىتتى
  • گازدان ۋلانۋدان ساقتانۋ بىلىمدەرى
  • التاي قالاسىندا ەلىمىزدەگى تۇڭعىش رەتكى «سىرلى التاي» اتىنداعى قار-مۇز شىراق سالتاناتى بولىپ ءوتتى