اعاجاي-التاي تورابى   ›   اقپارات ايدىنى   ›   سۋرەتتى حابارلار

التاي قالاسىندا ەلىمىزدەگى تۇڭعىش رەتكى «سىرلى التاي» اتىنداعى قار-مۇز شىراق سالتاناتى بولىپ ءوتتى

  ءوز ءتىلشىمىز قۇرمانگۇل جەڭىسبەك قىزى حابارلايدى. 2-ايدىڭ 19-كۇنى كەشتە، التاي قالاسى گەنارال تاۋى قار شاڭعى الاڭى الۋان ءتۇستى شىراقتارمەن اسەم نۇرعا بولەندى. جوعارى تەحىنيكالى قار-مۇز شىراق سالتاناتى 16 مينۋتتىڭ ىشىندە كوز جاۋىن الاتىن اسەم نۇر مەن تارتىمدى ماحاببات حيكاياسىن بەينەلەپ شىقتى.

قار شاڭعى الاڭى «سىرلى التاي» قار-مۇز شىراق سالتاناتىن كورۋگە كەلگەن كورەرمەندەرگە تولدى، اسەم شىراق نۇرى مەن رومانتيكالى ماحاببات حيكاياسى تاماشا قابىستى، شىراق سالتاناتىن كورۋگە كەلگەن جۇرتشىلىق تاڭ-تاماشا بولعان كوڭىل-كۇيلەرىن جاسىرا المادى.

  شىراق سالتاناتىنىڭ بولاتىنىن كۇنى بۇرىن ەستىپ بالا-شاعاسىمەن بىرلىكتە شەمىرشەك اۋىلدىعىنان ارنايى كەلگەن 84 جاستاعى ساناي اپامىز بىلاي: «مۇنداي كورىنىستى بۇرىن تەلەۆيزوردان عانا كورەتىنبىز، مىنە بۇگىن اۋىلىمىزدا وتكىزىلدى، اڭىزداردا ايتىلاتىن پەرىلەر الەمىنە بارعانداي تاڭ-تاماشا كوڭىل-كۇيدە بولدىم»،-دەدى تەبىرەنىپ.

  «سىرلى التاي» شىراق سالتاناتىنىڭ باستى كەيىپكەرى ايباتتى دا ەرجۇرەك التىن ساۋىتتى باتىر، ول قىلىشىن الىپ التىن تاۋدى قورعاپ تۇرسا، زەرەك دە ەلگەزەك قىران وزەنىنىڭ «پەريزاتى» باتىرمەن بىرلىكتە التايدىڭ كورىكتى تاۋ-وزەنى مەن تىنىشتىعىن ساقتاپ تۇر.

  شىراق سالتاناتى جەرگىلىكتى حالىقتىڭ اۋىلىنا دەگەن تەرەڭ سۇيىسپەنشىلىگىن جانە تۋعان ولكەنىڭ كوركى مەن تىنىشتىعىن ساقتاۋ ءۇشىن بار كۇشىن سالا كۇرەسەتىن رۋحىن توتەنشە جاندى بەينەلەدى. تۇسىنىكتى دە قاراپايىم حيكايا بارىسى كورەرمەندەردى اسەرلەندىردى. «جەرگىلىكتى تۇرعىنداردىڭ مەيىرباندىعىن شىنايى سەزىنە الدىم. بۇل جولى التايعا كەلىپ قار شاڭعى تەبۋدەن تىس، تالەيىمە جاراي قار-مۇز شىراق سالتاناتىن كوردىم، ەستەن كەتپەس يۋانشياۋ مەرەكەسىن وتكىزدىم، بۇل جولعى ساياحاتىما توتەنشە ريزامىن»،-دەدى بەيجينەن كەلگەن ساياحاتشى ۋاڭ شاۋ-ي.

  ۇعىسۋعا قاراعاندا، «سىرلى التاي» قار-مۇز شىراق سالتاناتى ءمولدىر سۋ، جاسىل تاۋ ـــ باعا جەتپەس بايلىق، قار-مۇزدىڭ ءوزى ــــ اسىل قازىنا ۇستانىمىن تاقىرىپ ەتكەن، شينجياڭ التاي ساياحاتتى دامىتۋ شەكتى سەرىكتەستىگى قارجىمەن قامداعان التاي قالاسىنداعى تۇڭعىش رەتكى مادەنيەت-ساياحات توعىستىرىلعان نىسان سانالادى. شىراق سالتاناتى «قارلى مەكەن ـ التايدىڭ» تابيعاتىن، ايباتتى گەنارال تاۋىن، كۇمىس وزەن قىراندى، قازاق ۇلتىنىڭ ءداستۇرلى ويىنى «قىزقۋاردى» ارتقى كورىنىس ەتە وتىرىپ، گەنارال تاۋى قار شاڭعى تەبۋ القابىن الۋان ءتۇستى نۇرعا بولەدى.

  بۇل جولعى شىراق سالتاناتى مەيلى تەحىنيكا الدە جاسامپازدىق جاعىنان بولسىن بۇرىن بولىپ كورمەگەن جاڭالىق بولدى، ءبىز گەنارال تاۋىنىڭ تابيعاتى مەن ونداعى قار-مۇز بايلىعىن تولىق پايدالانا وتىرىپ، تومەن تەمپەراتۋرانى جەڭىپ، دىبىس، جارىق، توك سىندى عىلىم-تەحىنيكالىق تاسىلدەردى پايدالانىپ، التاي ايماعىنىڭ اسەم تابيعي جاراتىلىستىق كورىنىسىن بەينەلەدىك. سونىمەن بىرگە، باستى تاقىرىپتى اناعۇرلىم ايشىقتاۋ ماقساتىندا ارناۋلى باس تاقىرىپ ءانى «كورىكتى التايدى» جازىپ شىقتىق، تارتىمدى حيكايا مەن اسەم ءان ارقىلى جەرگىلىكتى جۇرتشىلىققا، ساياحاتشىلارعا ەستەن كەتپەس تاماشا ەستەتيكالىق ءلاززات سيلادىق،-دەدى بۇل رەتكى شىراق سالتاناتىنىڭ بەينە كەسكىنىنىڭ جاسالۋىنا جاۋاپتى بولعان ەلىمىزدەگى شۋحۋ بەينە بىرلەسكەن قۇرۋشىسى ليۋ فىڭ.

  اۋدارعان: قىمبات قۇنتاي قىزى

جاۋاپتى رەداكتور: ءاننا اكىمقان قىزى
  • التاي قالاسىندا ەلىمىزدەگى تۇڭعىش رەتكى «سىرلى التاي» اتىنداعى قار-مۇز شىراق سالتاناتى بولىپ ءوتتى
  • بەرلين كينو مەرەكەسىندەگى ەڭ ۇزدىك ەر اكتەر ۋاڭ جيڭچۇن: التايدا تۋىپ، قىراننىڭ سۋىن ءىشىپ ەرجەتتىم
  • ايماعىمىزداعى قۇرىلىم رەفورماسى جۇرىلگەن 8 ورىننىڭ ۆيۋەسكاسى اسىلدى
  • يۋانشياۋ مەرەكەسىن قالاي وتكىزەمىز