اعاجاي-التاي تورابى   ›   مادەنيەت ارناسى   ›   بىلگەنگە مارجان

باقىتقا باستار 10 جول

  ءار ادام باقىتتى بولعىسى كەلەدى. ال سول باقىتتى بولىپ، شات-شادىمان عۇمىر كەشكەنگە نە كەدەرگى؟ باستار جولى قايدا؟

  باقىت جايلى اڭىز دا كوپ, سەبەبى ءار ادام باقىتتى ءار قيلى سەزىنەدى. ءبىر عۇلامالار "باقىت دەگەن - ءبىر عانا ءسات" دەپ تۇسىنىك بەرەدى. ەندى ءبىر دانىشپاندار "باقىتتىڭ تەورياسى جوق، بولعان دا ەمەس، بولمايدى دا" دەپ ايتادى. بىرەۋلەرگە باقىت - دەنساۋلىق، بىرەۋلەرگە - مانساپ، بىرەۋلەرگە - اقشا، بىرەۋلەرگە - وتباسى... ال كەيبىر جاندار ءۇشىن ءومىردىڭ ءوزى - باقىت.

  ادام ءوزىن باقىتتى سەزىنۋ ءۇشىن نە ىستەۋ كەرەك؟ بۇل كەز كەلگەن پەندە بالاسىن تولعاندىرارى حاق. ال پسيحولوگتار نە دەيدى؟ باقىتقا باستار جولعا ءتۇسۋ ءۇشىن قانداي ادەت پەن قىلىقتاردان باس تارتۋ كەرەك؟

  1. ساتسىزدىك ءۇشىن وزگە كىنالى ەمەس

  ءوزىنىڭ قاتەلىگىن وزگەدەن كورەتىن جاندار بارشىلىق. ءوزىن قالاي بولسىن، ىشتەي اقتاپ الادى. ساتسىزدىگى مەن قاتەلىگىن وزگەدەن كورەدى. وسىلايشا اينالاسىنداعى جاندار اراسىندا سىيى دا جوعالادى. ءوزى دە بىرەۋگە سەنىم ارتۋدان قالادى. دۇرىسى ءوز قاتەلىگىڭدى مويىنداپ، ماقساتىڭا جەتۋ جولىندا تالپىنۋ كەرەك. سەنىڭ ساتسىزدىگىڭ ءۇشىن وزگە كىنالى ەمەس. ءوزىڭ عانا...

  2. جالقاۋلىق جارعا جىعادى

  "ەرىنشەكتىڭ ەرتەڭى بىتپەس". بۇل ماقالدى مەكتەپ كەزىنەن ەسىتىپ كەلە جاتقان بولارسىز. ءتىپتى وزىڭىزگە قاراتىلا ايتىلعان ساتتەر دە بار بولار. ادام ماقساتىنا جەتكىسى كەلسە، ءبىر جولىن تابادى. ال ەرىنەتىن بولسا، سىلتاۋ ىزدەي باستايدى. جالقاۋدىڭ سىلتاۋى كوپ (مۇندايدا مي دا قاتتى جۇمىس جاساپ كەتەتىن سەكىلدى). بۇل دا باقىتقا باستار جولداعى ءبىر كەدەرگى.

  3. قورقىنىشتى جەڭۋ كەرەك

  ادام بويىنداعى قورقىنىش پەن ۇرەي - تابيعي قۇبىلىس، ءبىراق بۇلاردى جەڭە ءبىلۋ كەرەك. قورىقساڭ، قورقىپ جۇرە بەرەسىڭ. "تاۋەكەل ءتۇبى - جەلقايىق، مىنەسىڭ دە وتەسىڭ، ءۋايىم تۇبى − تۇڭعيىق، باتاسىڭ دا كەتەسىڭ".

  4. "مەنىكى ءارقاشان دۇرىس!"

  ءدال وسىنداي ۇستانىمداعى ادامداردىڭ جوعارى جەتىستىككە جەتىپ، باقىتتى بولۋى قيىن. سەبەبى وزىنىكىن ءارقاشان دۇرىس دەۋ - قاتەلىك. جاڭىلمايتىن جاق، سۇرىنبەيتىن تۇياق بولمايدى. "مەنىكى ءارقاشان دۇرىس!" دەپ كەۋدە قاعۋ مەن ونى قاشان دا دالەلدەۋگە تىرىسۋ - ماقسات جولىنداعى قولبايلاۋ. وزگەنىڭ كوزقاراسىن دا ەسكەرۋ قاجەت. سىننان ساباق الىپ، جاعىمسىز پىكىرلەردى نازارعا الماعان ءجون-اق.

  5. وزگەگە قاتتى ەلىكتەمەۋ دە كەرەك

  ادام جەتىستىككە جەتۋ ءۇشىن، ءوزىن باقىتتى سەزىنۋ ءۇشىن بىرەۋگە ەلىكتەۋى دە مۇمكىن. "ەلىكتەۋ قاجەت ەمەس" دەپ ايتۋعا بولمايدى. ول دا جوعارى ورلەۋگە تالپىندىراتىن ءبىر موتيۆاتسيا، ءبىراق تىم قاتتى ەلىكتەۋدىڭ دە قاجەتى جوق. ول ادام سەكىلدى ەمەس، ءوز ءومىرىڭنىڭ يەسى رەتىندە ءومىر ءسۇرۋ ماڭىزدى.

  6. جانىڭ قالاعان ىستەن قاشىقتاما

  ادامنىڭ قىزىعۋشىلىعى كوپ ىستە كومەكتەسەدى. ءوزىڭ تاڭداعان سالا بويىنشا قىزمەت جاساۋ دا، ءوزىڭدى باقىتتى سەزىندىرەدى. جەتىستىگىڭ دە، شىعار شىڭدارىڭ دا كوپ بولادى. قۇلشىنىسىڭ دا جوعارى. سەبەبى ءوزىڭ قالاعان سالادا ءجۇرسىڭ. سوندىقتان دا جانىڭ قالاعان ىستەن قاشىقتاماعان ءجون.

  7. كەلەڭسىزدىك ءۇشىن ءوزىڭدى قاتتى كىنالاۋدىڭ قاجەتى جوق

  باسىندا ايتقانداي، كىنانى وزگەدەن ىزدەيتىن جاندار بار. ءبىراق ءوزىن كىنالى ساناپ، جەردەن الىپ، جەرگە سالاتىن ادامدار دا ارامىزدا كەزدەسەدى. باستاعان ىسىمىزدەگى كەلەڭسىزدىكتەر مەن كەدەرگىلەر بارىمىزدە بولادى. ەشتەڭە جاساماعان، ەشتەڭە باستاماعان، العا ماقسات قويماعان جان عانا قاتەلەسپەۋى مۇمكىن.

  8. وتكەنمەن ءومىر سۇرۋدەن اۋلاق بولعان ءجون

  وتكەنگە وكپە جوق، كەلەر كۇننەن ءۇمىت كوپ. ءبارىمىز دە وتە شىققان ۋاقىتتى ەسكە الامىز. كەيدە ساعىنامىز دا. كەيدە سول كەزدە بۇلاي جاساۋ كەرەك ەدى دەپ وكىنەمىز دە. ءبىراق وتكەنمەن ءومىر سۇرۋدەن اۋلاق بولعان ءجون. بۇل - مۇلدە ەسكە الماۋ دەگەن ءسوز ەمەس. بۇل - بولاشاققا جوسپار قۇر، العا قادام باس دەگەن وي!

  9. وزىڭە كوپ تالاپ قويۋ دا قاجىتادى

  كەي جاندار بار ءىسىن الدىن الا جوسپارلاپ، ۋاقىتىن بەكىتىپ جۇرەدى. بۇل كەرەك-اق. ءبىراق وزىڭە قاتتى تالاپ قويۋدىڭ دا كەدەرگى كەلتىرەتىن تۇستارى بار. ادامعا ءبىر اۋىق دەمالىس تا قاجەت. اعايىن-تۋىس، دوس-جارانمەن ارالاسۋعا دا ۋاقىت تابۋ كەرەك. قايىرلى ىسپەن اينالىسۋعا دا ۋاقىت تابىڭىز. جاقسىلىق جاساڭىز، وزگەلەردى قۋانتىڭىز. بۇل سىزگە باقىت سىيلايدى.

  10. وزگەرىستەن قورىقپاڭىز

  كۇندەلىكتى ءبىر ءىس، قايتالانا بەرەتىن تىرلىك ءسىزدى جالىقتىرىپ، ءارى قاجىتادى. ومىرىڭىزگە وزگەرىس جاساپ تۇرىڭىز. پايدالى ىسپەن اينالىسىڭىز. ءوزىڭىزدى رۋحاني تۇرعىدا بايىتىڭىز. جاڭا قىزىعۋشىلىقتار تاۋىپ، جاڭا ارناعا ءتۇسىڭىز.

  ءيا، پسيحولوگتار وسىنداي كەڭەستەر ۇسىنادى. ال پسيحولوگيا ءپانىنىڭ كوپتەگەن وقۋلىقتارىندا "باقىت" تەرمينى "ءوز ومىرىنەن تولىق قاناعاتتانۋشىلىق سەزىمىن سەزىنگەن ادامنىڭ پسيحولوگيالىق كوڭىل-كۇي اۋانى" دەپ تۇسىندىرىلگەن.

  ەندەشە، ءسىز ءۇشىن باقىت دەگەن نە؟

جاۋاپتى رەداكتور: ءاننا اكىمقان قىزى
  • الداعى ءۇش كۇندىك اۋا رايىنان الدىن-الا مالىمەت
  • التايدىڭ قىسقى ساياحاتى قالايشا ورلەي ٴتۇستى
  • شي جينپيڭنىڭ حالىق جۇرەگىندەگى ىستەرى
  • الداعى ءۇش كۇندىك اۋا رايىنان الدىن-الا مالىمەت