اعاجاي-التاي تورابى   ›   مادەنيەت ارناسى   ›   بىلگەنگە مارجان

بۋ مونشاسىنا ءتۇسۋدىڭ ەرەجەلەرى

  مونشاعا ءتۇسۋ ــ تازالىقتىڭ عانا ەمەس، ساۋلىقتىڭ دا كەپىلى.

  قازىر مونشا تۇرلەرى كوپ جانە ولارعا ءتۇسۋدىڭ ءوز ەرجەسى مەن تاسىلدەرى بولادى. مونشانى جاقسى كورەتىندەر مۇنداي ەرەجە مەن تاسىلدەن حابارى دا بار شىعار. ەندەشە ساۋنا مونشانىڭ پايداسى مەن دارىلىك شوپتەردىڭ ەمى جايىندا كەڭىنەن توقتالا كەتپەكپىز.

  مونشاعا تۇسكەندە ءتۇرلى ەفير مايلارى، گۇلدەر مەن دارىلىك شوپتەر تۇنباسىنان ىستىق بۋدا (پاردا) ەمدىك شارالاردى وتكىزۋگە بولادى. سەبەبى ەفير مايى كوڭىل-كۇيدى كوتەرىپ، تەرىنى سەرگىتىپ، جاسارتادى. ول ءۇشىن ارنايى ماي، ەمدىك شوپتەر جانە ولاردان دايىندالعان ارالاسپا قوسپانى پايدالانۋعا بولادى. ول ءۇشىن بالعىن، كەپتىرىلگەن شوپتەر مەن جاپىراقتاردى جارتى ساعات ىستىق سۋدا ۇستايدى دا سۇزگىدەن وتكىزەدى. نە بولماسا شوپتەردى سىعىپ الىپ تاستايدى.

  ەكىنشى ءتاسىلى ــ ەمدىك وسىمدىكتەردى قۇرعاقتاي قويادى. ءبىرشاما ۋاقىت وتكەن سوڭ شوپتەر جۇمسارىپ، كەرەمەت ءيىس شىعادى. ول ءۇشىن قاراقات جاپىراعى مەن جالبىزدى پايدالانا الاسىز.

  دارىلىك شوپتەردىڭ تۇرلەرى مەن پايداسى:

  1.جالبىز ءيىسى كوڭىلدى كوتەرىپ، جۇرەككە پايداسىن تيگىزەدى؛

  2.كيىكوتىنىڭ (دۋشيتسا) ءيىسى تىنىس الۋ جولدارى مەن جۇيكە جۇيەسىن ەمدەيدى؛

  3.قارا قاراقاتتىڭ تۇنباسىنان شىعاتىن حوش ءيىس سۋىقتاعاندا كومەكتەسەدى ءارى تۇماۋدان كەيىن اعزانىڭ قايتا قالپىنا كەلۋىنە شيپاسى تيەدى.

  4.سۋىقتاۋدىڭ بەلگىسى ەندى باستالعاندا قىشانى (گورچيتسا) پايدالانسا، دەرتتىڭ ورشۋىنە جول بەرمەيدى. قايناعان سۋعا 1 شاي قاسىق قۇرعاق قىشانى ارالاستىرادى. ەسىڭىزدە بولسىن، ودان اشى، قىشقىلتىم ءيىس شىعادى.

  5. جوكە (ليپا) تەر شىعارۋ قىزمەتىن جەدەلدەتەدى.

  6. كاۋاس پەن سىرادان شىعاتىن ءيىستىڭ پايداسى زور. ول ءۇشىن 3 ليتر قايناعان سۋعا 50 گرام ناننان جاسالعان كاۋاس پەن سىرا قوسادى دا قىزىپ تۇرعان (پار) تاسقا شاشادى.

  7. ىدىستاعى ىستىق سۋعا جارتى شاي قاسىق بال، 5 تامشى ەۆكاليپت مايىن، 7-10 تامشى مەنتول مايىن تامىزادى. بۇدان شىققان كەرەمەت ءيىس كوڭىلدى جايلاندىرادى، جۇيكە جۇيەسىنە، جۇرەك پەن قانتامىر جۇيەلەرىنە جاقسى اسەر ەتەدى.

  8.اقجەلكەن (حرەن) كەز كەلگەن سۋىقتاۋ مەن تۇماۋدان ەمدەيدى. بالعىن نەمەسە كەپتىرىلگەن اقجەلكەن جاپىراعى ىستىق سۋدا جارتى ساعات تۇرعان سوڭ تاسقا تۇنبانى شاشادى.

  9.اپەلسين مايى ۇيقىسىزدىقپەن كۇرەستە شيپالى.

  10.ىستىق بۋدا كەيبىر ادامدار السىزدەنەدى، تىنىسى تارىلىپ، باسى اۋىرادى. بۇل قان قىسىمىنىڭ تومەندىگىنەن ورىن الادى. ول ءۇشىن مىناداي قوسپا دايىنداۋعا بولادى. تەرەك بۇرشىگىنەن 1 بولىك، تۇيمەشەتەننەن (پيجما) 2 بولىك، زۋبروۆكا جاپىراعىنان 1 بولىك قوسىپ تۇنبا جاسايدى دا تاسقا شاشادى؛

  11.زات الماسۋدى جاقسارتۋ ءۇشىن 100 گرام بالعا 100 گرام تۇز، 1 اس قاسىق سودا جانە سپيرتتى ارالاستىرىپ تەرىگە جاعادى. 10-15 مينۋتتان سوڭ سىرتىن پوليەتيلەن داكىمەن ورايدى.

  ەسىڭىزدە بولسىن!

  1. مونشا بۋىنا سۋعا جۋىنىپ، كىرۋدىڭ قاجەتى جوق. ءبىرىنشى كىرگەندە 5-7 مينۋتتان ارتىق وتىرماڭىز. تومەندە 1-2 مينۋت تۇرعان سوڭ بارىپ جوعارىعا وتىرىڭىز. دەنە قىزىپ، تەر شىققان سوڭ عانا پاردان شىعادى. سونىمەن قاتار پاردا وتىرعاننان گورى جاتقان ىڭعايلى. بۇل كەزدە دەنە بىردەي قىزادى دا بۇلشىق ەتتەر بوساڭسيدى.

  2. اراسىندا 15-20 مينۋت ءۇزىلىس جاساڭىز. شاي نەمەسە شىرىندار ءىشىڭىز. سونىمەن قاتار مونشادا سىرا ىشپەگەن ابزال. پارعا ءۇشىنشى رەت كىرگەننەن كەيىن عانا سابىندى پايدالانىڭىز.

  3. ساۋنا مونشاسىنا كەرىسىنشە پارعا كىرمەس بۇرىن دەنەنى سابىندايدى. تەرى ساڭىلاۋلارى كىر مەن مايدان تازارعاندا ەمدىك شارالار تەز ناتيجە بەرەدى.

  4. ساۋنا مونشاعا 1-2 ساعات اپتاسىنا 2 رەتتەن ارتىق تۇسۋگە بولمايدى.

جاۋاپتى رەداكتور: ءاننا اكىمقان قىزى
  • التىن كۇزدەگى التاي قالاسى
  • كولدەنەڭ قىستاعىنداعى شارۋالار شاتتىعى
  • قىزىلتاۋ شەكارا وتكەلى قوسكول جايلاۋىنىڭ كوركەم كورىنستەرىن تاماشالاڭىزدار!
  • تۇنىق سۋ، مول بالىق جانە قۋانىشتى بالىقشىلار