التاي گازەتىنىڭ پراكتيكانت ٴتىلشىسى ياڭ ۋيشۋان، ەرىكتى ٴتىلشى جىڭ مىڭيۋە حابارلايدى.
جاقىندا، التاي قالاسىنداعى ٴارقايسى قۇرىلىس ورىندارى جۇمىس جۇرگىزۋ بارىسىندا پايدا بولاتىن شاڭ ـ توزاڭدى جونگە سالۋ تەبىنىن ارتتىرىپ، جەلىلەس شارالار قولدانۋ ارقىلى جۇمىس جۇرگىزۋ بارىسىندا پايدا بولاتىن شاڭ ـ توزاڭ مەن شۋىلدىڭ ورتاعا جانە ماڭىنداعى تۇرعىندارعا جاسايتىن ىقپالىن تەجەپ، وركەنيەتتى قۇرىلىس جۇرگىزىپ، ورتانى ويداعىداي قورعادى.
التاي قالاسىنىڭ جينحۋا تۇرعىندار شاعىن رايونىنىڭ قۇرىلىس مايدانىندا شاڭ ـ توزاڭدى توسۋ ٴۇشىن، قۇرىلىس جۇرگىزەتىن ورىنداعى ماتەريالداردى شاڭ ـ توزاڭدى توساتىن تورمەن جاۋىپ، قۇرىلىس مايدانىن جالپى بەتتىك قورشادى. سۋ شاشۋ ماشيناسىمەن قۇرىلىس مايدانىنا سۋ شاشىپ، شاڭ ـ توزاڭدى ٴونىمدى تەجەدى. سونىمەن بىرگە، قۇرىلىس نىسان ٴبولىمى كىرىپ ـ شىعاتىن ەسىككە اۆتوماتتى جۋۋ ماشيناسىن ورناتىپ، وتكەن ـ كەتكەن كولىكتەردىڭ دوڭگەلەگىن جۋىپ تازالادى ٴارى ارناۋلى ادام ورنالاستىرىپ، قاتاڭ تەكسەرىپ، كولىك جۋىپ تازالانعاننان كەيىن جۇرۋىنە جول قويىپ، جولدى لاستاۋىنان ساقتانىپ، تاماشا قۇرىلىس ورتاسىن جاراتتى.
التاي قالالىق جينحۋا تۇرعىندار شاعىن رايونى قۇرىلىس نىسانى مايدانىنىڭ جاۋاپتىسى لي جۇن بىلاي دەدى: «قۇرىلىس جۇرگىزەتىن ورىندا شاڭ ـ توزاڭدى ازايتۋ جابدىعىن جانە كولىك جۋۋ جابدىعىن ورناتىپ، كولىكتەردىڭ كوشەنى بىلعاۋىنىڭ الدىن الدىق».
التى جاق حالىقارالىق الاڭى قۇرىلىس نىسانىنىڭ ديرەكتورى جيا گو بىلاي دەدى: «ورتانى قورعاۋ مەن حاۋىپسىز وركەنيەتتى قۇرىلىس جۇرگىزۋگە ەرەكشە ٴمان بەردىك. بيىل جاۋاپتى تاراۋلاردىڭ ورتانى قورعاۋ قىزمەت تالابى بويىنشا شاڭ ـ توزاڭ مەن شۋىلدى ازايتىپ، وركەنيەتتى قۇرىلىس جۇرگىزىپ ورتانى قورعاۋدى كۇشەيتتىك».
اۋدارعان: گۇلجان كوكەناي قىزى
