اعاجاي-التاي تورابى   ›   اقپارات ايدىنى   ›   ماڭىزدى حابارلار

جەل وتىندەگى جىلى اعىس

ءتىلشىمىز ماقسات قيزات ۇلى

  ءجايىر تاۋدىڭ بوكتەرىندە وتىرعان مالشىلار 3 - ايدىڭ سوڭىن الا كوكتەۋلىككە كوشە باستادى.

  بيىلعى كوكتەم باستابىندا جۇمساقتاۋ كەلىپ ەدى، سوڭىن الا «قاباعىن قارىس ءتۇيىپ»، قارى ارالاس جاڭبىرىن قۇيىپ تۇرىپ العانى. كوشتىڭ باسى ءبىر قوزعالىپ كەتكەسىن توقتاسىن با، ءدوربىلجىن اۋدانىنىڭ ەمىل فەرماسىنداعى مالشىلار قىستاۋلىعىنان ەرتە شىعىپ، كۇنى بۇرىن كوكتەۋلىككە جەتىپ الۋدى كوزدەدى. توپەپ تۇرعان اق جاڭبىردى ەلەمەي مالشىلار كەلەدى، جانى ءسىرى شوپان ۇرپاعى بۇدان بۇرىن دا قارلى بۇرقاسىننىڭ تالايىن كورگەن، باسقاسى ەمەس، كوش جولىندا قىستان ازەر شىققان كوتەرەم ارىق - تۇراقتىڭ جايى قيىن، قاتتى قايىرىم جۇرىسكە شىدامايدى، جول ورتادا تۋعان ءتولدىڭ الەگىن ايتىپ جەتكىزۋدىڭ ءوزى تاۋسىلماس اڭگىمە.

  مىنە وسىلاي 3 - ايدىڭ 24 - كۇنى مالشىلار ءتۇس اۋا «مايتاستىڭ» جەل وتىنە كەلىپ قالدى. باعاناعىداي ەمەس، جاڭبىر تولاستاعان، ءبىراق بۇل جەردىڭ «اتىشۋلى» جەل ءوتى ەكەنىن ەكىنىڭ ءبىرى بىلەدى، ورقاشاردان ويقاستاپ جەتكەن قارا جەل مالشىلاردىڭ كونە كۇپىسىن جۇلمالاپ، اش - ارىق مالدىڭ زىقىسىن كەتىردى.

  ۇزاق جۇرىستەن قالجىراپ كەلە جاتقان مالشىلار ماي جولدا زاقپىنىڭ تاسىنداي زىرلاپ كەلە جاتقان اپپاق اق كولىكتەردىڭ وزدەرىنە قاراي بەت بۇرعانىن كوردى. ءدال وسىندايدا ات ۇستىندە ارىپ كەلە جاتقانىڭدا ءجونىڭدى سۇراماي، جول سۇراپ «جىنىڭدى» كەلتىرەتىندەر دە كەزىگەدى. بۇلاردا سونىڭ بىرەۋى مە دەپ مالشىلار كوڭىلىن جىقپاستان جۇرە بەرگەن. ءبىراق زاماننىڭ ادەمى اق كولىكتەرى قاز - قاتار جول شەتىنە تۇرا قالدى دا، ىشتەرىنەن مالشىلارعا تانىس جۇزدەر قىلاڭ بەردى.

  − ۇي، مىناۋ ءبىزدىڭ بايان عوي.

  − وي، بۇلار ناعىپ ءجۇر؟

  − جيىنعا كەتىپ بارا جاتقان بولار.

  −ءبالى، ءبىزدىڭ كادرلار وسىنداي بولماسا، كادر بولا ما.

  قالجىراپ كەلە جاتقان مالشىلار قاپەلىمدە ءتۇس كورگەندەي اڭتارىلىپ قالدى. شوپاندار شارشاپ - شالدىققاندارىن ۇمىتىپ، اتتان تۇسە سالا فەرماداعى كادرلارمەن امانداسىپ، قۇشاق ايقاستىرىپ ۇلگىردى.

  مالشىلاردىڭ كوكتەۋلىككە قاراي كوشكەنىن ەستىگەن ءدوربىلجىن اۋداندىق ەمىل مال فەرماسى فەرما پارتكومىنىڭ مۇشەسى، ۇگىتكە جاۋاپتى قىزمەتكەرى بايان رامازان قىزى باستاعان ءبىر توپ كادردى مالشىلاردىڭ الدىنان شىعىپ، حال - جاعدايىن ۇعىسىپ، ولارعا ەكى ءماجىلىس رۋحىن، پارتيانىڭ ابزال ساياساتىن جەتكىزۋگە جىبەرگەنى وسى ەدى.

  24 - ناۋرىز مالشىلاردىڭ الدىنان شىققان كادرلار دەنساۋلىق ساقتاۋ اترەتى، مال شيپاگەرلەر قوسىنى، «مەيىربان انالار قور قوعامى» قاتارلى ۇيىمداردى جۇمىلدىرىپ، تەمىرتام قالاشىعى مەن قۇجىرتى موڭعۇل ۇلتتىق اۋىلىنىڭ ءتۇيىلىس تۇسىنان «حالىققا قولايلى قىزمەت وتەۋ» ورتالىعىن قۇرىپ، مالشىلاردىڭ دەنساۋلىعىن تەكسەرىپ، مالشىلارعا اس - سۋ بەرىپ، پارتيا مەن ۇكىمەتتىڭ دانا ساياساتىن جەتكىزدى.

  «ءبىز بۇرىندارى كوشىپ جۇرگەن كەزىمىزدە ەشكىم دە الدىمىزدان شىعىپ، اس - سۋىمىزدى دايىنداپ بەرمەيتىن. مىنە ءوزىڭىز كورىپ وتىرعانداي، پارتيانىڭ كادرلارى الدىمىزدان شىعىپ، دەنساۋلىعىمىزدى تەكسەرىپ، جىلى تاماعىن بەرىپ، قوعامدا بولىپ جاتقان جاڭالىقتارمەن ءبولىسىپ جاتىر. بۇل دا بولسا پارتيانىڭ ارقاسى، پارتيانىڭ دانا باسشىلىعى بولعاننان كەيىن عانا، وسى كۇنگە جەتىپ وتىرمىز. قازىر كادرلار حالىقپەن بىرگە جاساپ، بىرگە تۇرىپ كەلەدى، ولار حالىقتى كەدەيلىكتەن قۇتىلدىرۋدى كوزدە ۇستاپ، جۇرتىمىزدى دوڭگەلەك داۋلەتتى قوعامعا جەتۋگە جەتەلەدى. ءبىزدىڭ پارتياعا، پارتيالى كادرلارعا العىسىمىز شەكسىز.

  «مەن تاياۋدا راديودان باس شۋجي شي جينپيڭنىڭ مەملەكەتتىك 13 - كەزەكتى حالىق قۇرىلتايىنىڭ 1 - ماجىلىسىندە تولىق داۋىسپەن مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى بولىپ سايلانعانىن ەستىپ قاتتى قۋاندىم. بۇل ءبىزدىڭ بارلىعىمىزدىڭ تىلەگىمىز ەدى. تىلەگىمىز ورىندالدى. ءبىز ەندى پارتيانىڭ دانا باسشىلىعىندا ءبىر جاعادان باس، ءبىر جەڭنەن قول شىعارىپ، جۇڭحۋ ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋعا قۇلشىنامىز. ماڭايىمىزداعى مالشىلاردىڭ تۇرمىسى كۇننەن - كۇنگە جاقسارىپ كەلەدى، تەگىن ەمدەلەمىز، بالالارىمىز دا تەگىن وقيدى، ۇكىمەت باسپانامىزدى تەگىن سالىپ بەردى. ەندى وسىدان ارتىق باقىت بار ما، باقىت دەگەنىمىز باسقا قونعان باقتى ايالاۋ ەمەس پە»، - دەيدى ەمىل مال فەرماسىنىڭ مالشىسى ادىلەت شاكەن ۇلى.

  ءدوربىلجىن اۋداندىق مال شارۋاشىلىق مەكەمەسىنىڭ باستىعى ەربولات بەيسەن ۇلىنىڭ تانىستىرۋىنشا، ءدوربىلجىن اۋدانى باعىمشىلىقتى نەگىز ەتەتىن اۋدانداردىڭ ءبىرى، بيىل 2000نان استام وتباسى، 8000نان استام مالشى، 340 مىڭنان استام مال كوكتەۋلىككە بەت تۇزەپتى. مالشىلاردىڭ كەيبىرەۋى 200 كيلومەتر جول باسىپ، قىستاۋلىعىنان كوكتەۋلىگىنە ازەر جەتەدى ەكەن. مالشىلاردىڭ كوشى - قون قيىنشىلىعىن شەشۋ ءۇشىن، ءدوربىلجىن اۋدانى قازىنادان 500 مىڭ يۋان قارجى اجىراتىپ، 466 توننا ءشوپ، 330 توننا جەم دايىنداپ، مالشىلاردىڭ كوكتەۋلىگىنە امان - ەسەن جەتۋىنە تاماشا نەگىز قالاپتى.

  «ۇزاق جولدا مال ايداۋ وڭاي شارۋا ەمەس، اۋىرىپ - سىرقاپ قالاتىن جاعداي تۋىلادى، ءبىز وسىنى ەسكەرىپ مالشىلارىمىزدىڭ الدىنان شىعىپ، دەنساۋلىعىن تەكسەرىپ، ءدارى - دارمەك بەرىپ، ولاردىڭ امان - ەسەن اۋىلىنا جەتۋىنە كەپىلدىك ەتۋگە كەلدىك. سونىمەن قاتار، مەملەكەتتىك ەكى ءماجىلىستىڭ رۋحىن مالشىلار جۇرەگىنە ۇيالاتىپ، مەملەكەتىمىزدىڭ ابزال ساياساتىن نەگىزگى ساتىداعى بۇقاراعا تۇسىندىرۋگە تالپىندىق. <كۇش بىرلىكتە> دەگەن ەمەس پە، كادر مەن مالشى سەلبەسىپ، ىنتىماقتاسا العا ىلگەرىلەسەك، جارقىن بولاشاقتىڭ اۋىلى الىس قونباس»، - دەيدى ەمىل مال فەرماسى پارتكومىنىڭ مۇشەسى، ۇگىت كادرى بايان.
 كادرلار مەن مالشىلار قارا جوندا، قارا قوستا باس قوستى، شىعىستان جىلى اعىس كەلدى، بۇل كوكتەمنىڭ شۋاعى، پارتيانىڭ ابزال ساياساتىنىڭ نۇرى ەدى.

جاۋاپتى رەداكتور: جانار قاناپيا قىزى
  • ۇلىڭگىردەگى مۇز قالا
  • ۇلى وتاندى جىرلاپ، پارتياعا شەكسىز العىس ءبىلدىردى
  • چارقىلىق كروران اۋەجايى رەسمي ىسكە قوسىلدى
  • جىل قۇستارى تابيعاتقا ءسان قوستى