اعاجاي-التاي تورابى   ›   زاڭ-تارازى   ›   تارازى

ءۇيىن اشەكەيلەتۋ ۋاقىتى سوزىلسا دا، ءۇي يەسىنىڭ تولەم تالابى تويتارىلدى

چىن جياجيا، ما جۇن

  جاڭا ءۇيىن اشەكەيلەتۋ قۋانىشتى ءىس قوي، ءۇرىمجى اۋدانىنىڭ تۇرعىنى جياڭ فىڭ جاڭا ءۇيىنىڭ كىلتىن العان سوڭ، ءۇي اشەكەيلەيتىن ءبىر سەرىكتەستىكپەن ءۇيىن اشەكەيلەتۋ توقتامىنا قول قويىسادى، الايدا كەلىسىمدى ۋاقىت تولسا دا، ءۇي ءالى اشەكەيلەنىپ بولمايدى. جياڭ فىڭ ءۇي اشەكەيلەۋ سەرىكتەستىگىنىڭ ۇستىنەن توقتامعا قايشىلىق جاساۋ ايىبىن تولەسىن دەپ ارىز بەرەدى، حالىق سوتى مەكەمەسى ونىڭ ارىزىن تويتاردى، بۇل، ءسىرا، قانداي ءىس؟

  2016 - جىلى تامىزدىڭ 3 - كۇنى جياڭ فىڭ ءۇي اشەكەيلەيتىن ءبىر سەرىكتەستىكپەن «ءۇي اشەكەيلەتۋ توقتامىن» جاساسىپ، 2016 - جىلى قىركۇيەكتىڭ 23 - كۇنى اشەكەيلەپ بولۋعا، اشەكەيلەۋ سوماسى 180 مىڭ يۋاندى ۇشكە ءبولىپ بەرۋگە، ياعني جۇمىس باستاۋدان ىلگەرى %60ىن، جۇمىستىڭ جارتىسى بىتكەندە %37ىن، ەكى جاق وتكىزىپ الىپ تولىمدى بولعان سوڭ قالعان %3ىن بەرۋگە كەلىسەدى. توقتامعا قول قويعاننان كەيىن، سەرىكتەستىك ادام ۇيىمداستىرىپ ءۇي اشەكەيلەۋ جۇمىسىن باستايدى، الايدا كەلىسىمدى ۋاقىت تولعاندا جۇمىس ءالى اقىرلاسپايدى. جياڭ فىڭنىڭ قايتا - قايتا قۋزاۋىمەن سول جىلى جەلتوقساننىڭ 18 - كۇنى ءۇيدىڭ تازالىق بولمەسىندەگى ءبىر ءبولىم ىلگىش، سورە جانە بولمە سىرتىنداعى شكاپتارى ورناماعانىنان سىرت، قالعان جۇمىستارى تولىق اياقتايدى. جياڭ فىڭ وسى كەزدە عانا الدىڭعى 2 رەتتە بەرىلەتىن ءۇي اشەكەيلەۋ اقىسىن بەرەدى.

  ۇيىنە كىرگەننەن كەيىن جياڭ فىڭ ورناتۋ اقىسى 2987 يۋان تۇراتىن ىلگىش، سورە ساتىپ الادى. «وزگەلەردىڭ اشەكەيلەتكەن ءۇيىنىڭ بارلىق مۇكامالى تولىق، ال مەن ىلگىش پەن سورەنىڭ ءبارىن ءوزىم ساتىپ الدىم، ونىڭ ۇستىنە اقىسىن بەرىپ ورناتقىزدىم، بولمە سىرتىنداعى شكاپتى دا ورناتپادى» دەپ اشۋلانعان جياڭ فىڭ ءۇي اشەكەيلەۋ سەرىكتەستىگى توقتامعا قايشىلىق جاسادى ءارى كوتەرمەگە الۋشىنىڭ كەسىرىنەن جۇمىس ۋاقىتى سوزىلدى دەپ قاراپ، سوزىلعان ءار كۇن ءۇشىن قارسى جاقتان 500 يۋان توقتامعا قايشىلىق جاساۋ ايىبىن تولەۋدى تالاپ ەتەدى.

  2017 - جىلى مامىردىڭ 17 - كۇنى جياڭ فىڭ ءۇرىمجى اۋداندىق حالىق سوتى مەكەمەسىنە ارىز بەرىپ، ءۇي اشەكەيلەۋ سەرىكتەستىگىمەن جاساسقان «ءۇي اشەكەيلەتۋ توقتامىن» كۇشىنەن قالدىرىپ، ءۇي اشەكەيلەۋ سەرىكتەستىگىنەن توقتامعا قايشىلىق جاساعانى ءۇشىن 90 مىڭ يۋان، ءوزى تولەگەن ىلگىش، سورەنى ورناتقان 2987 يۋان اقىنى، 2000 يۋان قاتىناس قاراجاتىن، ءالى ورناماعان بولمە سىرتىنداعى شكاپ ءۇشىن 7560 يۋان، سونداي - اق ۇيگە ۋاعىندا كىرە الماي سىرتتان ءۇي جالداعانى ءۇشىن 40 مىڭ تولەم تولەتىپ بەرۋدى تالاپ ەتەدى.

  دەلونى سوتتا قاراۋ بارىسىندا ءۇي اشەكەيلەۋ سەرىكتەستىگى: «ءۇي الدەقاشان اشەكەيلەنىپ، 2016 - جىلدىڭ سوڭىندا جياڭ فىڭعا وتكىزىپ بەرگەنبىز، ونىڭ ۇستىنە ول ۇيىنە كوشىپ كىرگەن، مىنە بۇل ونىڭ اشەكەيلەۋ جۇمىسى اياقتاعانىن مويىنداعانىن تۇسىندىرەدى. ءبىز جياڭ فىڭ جانىنان تولەگەن ءتۇرلى ىلگىش، سورەنى ورناتۋ اقىسىن مويىندايمىز، بولمە سىرتىنداعى شكاپتى سەرىكتەستىگىمىز 2017 - جىلى تامىز ايىندا ورناتىپ بولعان، ونىڭ توقتامدى كۇشىنەن قالدىرۋدى جانە توقتامعا قايشىلىق جاساۋ ايىبىن تالاپ ەتۋىنىڭ ەشقانداي زاڭدىق نەگىزى جوق» دەپ قارسى داۋ ايتادى.

  حالىق سوتى مەكەمەسى دەلونى تەكسەرگەننەن كەيىن، زاڭ بويىنشا جاسالعان توقتام زاڭنىڭ قورعاۋىندا بولادى. تالاپكەر مەن ايىپكەر جاساسقان «ءۇي اشەكەيلەۋ توقتامى» ەكى جاقتىڭ ادامدارى اقىلداسىپ بىرلىككە كەلگەنىن بىلدىرەدى، سوندىقتان توقتام كۇشكە يە. ەكى جاق توقتامعا قول قويعاننان كەيىن، 2016 - جىلى جەلتوقساندا توقتامدا ايتىلعان جۇمىس نەگىزىنەن اقىرلاسىپ، تالاپكەر دە الدىڭعى 2 رەتكى سومانى بەرىپ، توقتام نەگىزىنەن الدەقاشان ورىندالدى، تەك ءبىر ءبولىم ىلگىش، سورە جانە بولمە سىرتىنداعى شكاپ ورناماعان، توقتامداعى باستى ماقسات ىسكە استى، توقتامدى كۇشىنەن قالدىراتىنداي العى شارت جوق، ونىڭ ۇستىنە ارىزدانۋ بارىسىندا ايىپكەر قۇرىلىس جۇمىسىن بۇكىلدەي اياقتاتقان ءارى پايدالانۋعا بەرگەن، تالاپكەردىڭ توقتامدى كۇشىنەن قالدىرۋ تالابى زاڭدىق بەلگىلەمەگە ۇيلەسپەيدى، سوندىقتان حالىق سوتى مەكەمەسى مۇنى قۇپتامايدى دەپ قارادى.

  تالاپكەر قۋاتتاعان قايشىلىق جاساۋ سوماسى جونىندە، باس تەرگەۋشى سۋديا: «توقتامداعى كەلىسىم بويىنشا ءۇيىن اشەكەيلەتۋشى ادام ءۇي اشەكەيلەۋ سوماسىن ۋاعىندا بەرمەگەن، كەشىكتىرگەن ءار كۇنىنە قارسى جاققا 500 يۋاننان توقتامعا قايشىلىق جاساۋ ايىبىن؛ ءۇي اشەكەيلەۋدى كوتەرمەگە الۋشى قۇرىلىس ۋاقىتىن سوزعانى ءۇشىن كەشىكتىرگەن ءار كۇنىنە قارسى جاققا 500 يۋاننان توقتامعا قايشىلىق جاساۋ ايىبىن تولەۋى ءتيىس. ايىپكەر توقتامداعى ۋاقىت بويىنشا اشەكەيلەۋ جۇمىسىن بىتىرمەگەن، ال تالاپكەر دە توقتام بويىنشا اشەكەيلەۋ سوماسىن ۋاعىندا بەرمەگەن»، - دەپ تانىستىردى.

  2017 - جىلى قاراشانىڭ 6 - كۇنى حالىق سوتى مەكەمەسى «جۇڭحۋا حالىق رەسپۋبليكاسىنىڭ توقتام زاڭىنا» ساي، ايىپكەر ءۇي اشەكەيلەۋ سەرىكتەستىگى تالاپكەر جياڭ فىڭعا ىلگىش، سورەنى ورناتقىزعان اقىسى ءۇشىن 2987 يۋان تولەسىن، جياڭ فىڭنىڭ باسقا تالابى تويتارىلسىن دەگەن ۇكىم شىعاردى.

  «شينجياڭ زاڭ گازەتىنەن» اۋدارعان:ساعىنبەك رابات ۇلى

جاۋاپتى رەداكتور: جانار قاناپيا قىزى
  • ساياسي كەڭەس مۇشەلەرى گرۋپپالارعا ءبولىنىپ، ۇكىمەت قىزمەتىنەن جاسالعان باياندامانى تالقىلادى
  • سەلبەستىك قوعامىنىڭ ەرەكشە ونىمدەرى ەل نازارىنا ءىلىندى
  • اۆتونوميالى رايوندىق 13 - كەزەكتى حالىق قۇرىلتايىنىڭ 1 -ءماجىلىسى اشىلدى
  • ساياسي كەڭەس اۆتونوميالى رايوندىق 12 - كەزەكتى كوميتەتىنىڭ 1 - ءماجىلىسى اشىلدى