اعاجاي-التاي تورابى   ›   زاڭ-تارازى   ›   تارازى

4S دۇكەنىنىڭ بۇل ارەكەتى دۇرىس پا

  «4S دۇكەنى قۇنى 50 يۋاندىق اۆتوكولىك كورسەتكى تاقتاسىن ماعان 4400 يۋانعا ساتىپ بەردى»

  جاقىندا قۇلجا قالاسىنىڭ تۇرعىنى مياۋ xx گازەتىمىزگە: «شينجياڭداعى ءمالىم اۆتوكولىك ساتۋ، قىزمەت كورسەتۋ شەكتى سەرىكتەستىگى الارمانداردى الداپ، تۇتىنۋشىلاردىڭ زاڭدى ۇقىق - مۇددەسىن زياندادى» دەپ شاعىم ايتتى.اۆتوكولىك يەسى: 4S دۇكەنى تۇتىنۋعا ادەيى ەلىكتىرىپ وتىر

  مياۋ xx بىلاي دەدى: 2012 - جىلى تامىز ايىندا شينجياڭداعى ءمالىم اۆتوكولىك ساتۋ، قىزمەت كورسەتۋ شەكتى سەرىكتەستىگىنەن (تومەندە 4S دۇكەنى دەلىنەدى) ءمالىم ماركاداعى دالالىق اۆتوكولىگىن ساتىپ العانمىن. 2016 - جىلى 10 - قازان تاڭەرتەڭ دالالىق اۆتوكولىكتى وتالدىرىپ جاتىپ كورسەتكى تاقتاسىنىڭ قوزعالماي تۇرعانىن بايقادىم. سودان دەرەۋ 4S دۇكەنىنىڭ ديرەكتورىنا تەلەفون شالىپ ەدىم، ديرەكتور قاربالاس ەكەنىن ايتىپ، ماعان ما ۇستازدىڭ تەلەفون ءنومىرىن بەرىپ، سول كىسىگە حابارلاسۋىمدى ايتتى.

  مياۋ xx: ما ۇستازعا تەلەفون شالعانىمدا، ول كىسى كورسەتكى تاقتاسى قىزمەت ىستەمەسە بۇزىلعانى، 4S دۇكەنىنە بارىپ جاڭاسىن الماستىرىپ الىڭىز دەپ ءجونىن ايتتى، - دەدى.

  مياۋ xx: مەنىڭ بىلۋىمشە، جايشىلىقتا اۆتوكولىك كەرەكتەن شىعارىلعان كۇننىڭ وزىندە ونىڭ كورسەتكى تاقتاسى بۇزىلا قويمايدى، ونىڭ ۇستىنە 300 نەشە مىڭ يۋانعا العان اۆتوكولىك 80 مىڭ كيلومەتر عانا جول باسقان، اۋدارىپ المايىن، سوعىپ المايىن، ويدا جوق ۋاقيعالارعا ۇشىراپ قالمايىن دەپ ابايلاپ جۇرگىزىپ جۇرگەن اۆتوكولىگىمنىڭ كورسەتكى تاقتاسىنىڭ اياق استىنان بۇزىلىپ قالعانىنىڭ ەش بايىبىنا بارا المادىم، - دەيدى.

  مياۋ xx 4S دۇكەنىنە بارىپ ديرەكتوردان ءمان - جايدى سۇرايدى.

  مياۋ xx: سول كەزدە ديرەكتور ماعان اۆتوكولىگىڭىزدەن كورىنگەن مۇنداي ماسەلەنى شەشۋدەگى بىردەن - ءبىر امال كورسەتكى تاقتانى الماستىرۋ، الماستىرعان سوڭ ماسەلە بايقالماسا، وندا بۇرىنعى كورسەتكى تاقتادان كىنارات شىققانى، - دەدى.− ديرەكتور مەنىڭ ماقۇلدىعىمدى الماستان، 2 رەمونتشىعا جاڭاسىن اكەلدىرىپ الماستىرتقىزدى، - دەدى مياۋ xx.

  كورسەتكى تاقتاسى الماستىرىلعاننان كەيىن، مياۋ xx 4S دۇكەنىنە كارتچكاسىنان 4400 يۋان اۋدارىپ بەرەدى.

  بيىل ناۋرىز ايىندا مياۋ xx اسىلگى كورسەتكى تاقتاسىن دوسى تانىستىرعان ەلەكتر جابدىقتارىن رەمونتتايتىن ءبىر دۇكەنگە اكەلىپ كورسەتەدى. وسى دۇكەندەگى ۋاڭ ۇستاز ونىڭ ءسوزىن ەستىگەن سوڭ، تەكسەرىپ كورەدى دە، ساندى مالىمەتىنەن كىلتيپان شىققاندىعىن ايتادى.

  ۋاڭ ۇستاز الگى كورسەتكى تاقتاسىن 10 مينۋتتا جوندەپ بولىپ، رەمونت اقىسىنا 50 يۋان الادى.

  «50 يۋانعا شەشىلەتىن ماسەلەگە 4S دۇكەنى ماعان 4400 يۋان تولەتىپ جاڭاسىن الماستىرتقىزعانى قالاي» دەپ مياۋ xx 4S دۇكەنىنىڭ ارەكەتىنەن كۇدىكتەنەدى.

  ءتىلشى مياۋ xxتىڭ كورسەتكى تاقتاسىن رەمونتتاعان ۋاڭ ۇستازعا تەلەفون شالادى، ول كىسى: مياۋ xx جوندەتۋگە اكەلگەن كورسەتكى تاقتاسىنان ازداپ كىلتيپان شىققان ەكەن، شاعىن دۇكەندەردىڭ ءوزى جوندەي بەرەتىن مۇنداي كىلتيپاندى 4S دۇكەنىنىڭ جوندەي المايتىن ءجونى جوق، - دەيدى.

  4S دۇكەنى: قۋلىق - سۇمدىق ىستەگەن جوقپىز

  مياۋ xx اڭىس ەتكەن جاعدايدى ۇعىسۋ ءۇشىن، ءتىلشى 4S دۇكەنىمەن حابارلاسادى.

  4S دۇكەنى بۇل ماسەلەگە ەرەكشە ءمان بەرىپ، مۇقيات تەكسەرگەننەن كەيىن تىلشىگە: دالالىق اۆتوكولىگىنىڭ كۇتىمدەلۋ ۋاقىتى 2014 - جىلى تامىز ايىندا تولعان. ال وسى اۆتوكولىكتىڭ يەسى 2016 - جىلى 10 - قازاندا دۇكەنىمىزگە تەلەفون شالىپ، كورسەتكى تاقتاسىنىڭ قالىپتى قىزمەت ىستەمەي تۇرعاندىعىن ايتتى، تەحنيكتەرىمىز ول كىسىنىڭ دۇكەنىمىزگە كەلىپ تەكسەرتىپ، رەمونتتاتۋىن ەسكەرتكەن، - دەيدى.

  كەيىنتىننەن وسى دۇكەن تەحنيكتەرىنە كىلتيپاندى تەكسەرتىپ ساراپتاتقان، اقىرعى ەسەپتە كورسەتكى تاقتاسىنان كىلتيپان شىققاندىعى تۇراقتاندىرىلعان، سونداي - اق الارمانعا: «كورسەتكى تاقتاسىن رەمونتتاي المايتىنىمىز، بىرىنشىدەن، زاۆود مۇنداي زاپاس بولشەكپەن قامدامايدى، ەكىنشىدەن، كورسەتكى تاقتاسى جوعارى دالدىكتەگى ەلەكتروندىق ەلەمەنتكە جاتادى، بىزدە مۇنداي جابدىقتى جوندەيتىن تەحنيكا جوق، باسقا دۇكەندەرگە اپارىپ كورەسىز بە، الدە كورسەتكى تاقتاسىن الماستىراسىز با، ءوزىڭىز ءبىلىڭىز»، - دەپ جاعدايدى ەگجەي - تەگجەيلى تۇسىندىرگەن.

  «الارمان دوستارىنان اقىل - كەڭەس سۇراپ، مۇقيات ويلاسقاننان كەيىن، جاڭا كورسەتكى تاقتاسىن الماستىرۋعا ماقۇل بولدى، ءبىز 12 - قازاندا رەمونتتاۋ تالونىن كەستىك، ول كىسى قولىن قويىپ تۇراقتاندىردى. الارماننىڭ شىعىنىنىڭ ازىراق بولۋىن ويلاعان دۇكەنىمىز سەرىكتەستىك باسشىلارىنا ءوتىنىش ەتىپ ءجۇرىپ، الارمانعا بەلگىلى دارەجەدە تيىمدىلىك جاسادى» دەي كەلىپ، 4S دۇكەنىندەگى گو فاميليالى ديرەكتور: «دۇكەنىمىز بۇل ءىستى جوندەۋگە قىزمەت كورسەتۋ جولدارىمەن، سونداي - اق اۆتوكولىك سالاسىنىڭ قىزمەت كورسەتۋ تالاپتارى بويىنشا ءبىر جايلى ەتتى، ايتۋ، ءتۇسىندىرۋ بورىشىمىزدى وتەدىك، الارمان ايتقانداي الداپ - اربامادىق، - دەدى.

  مياۋ xx 4S دۇكەنىنىڭ ايتقاندارىنا ريزا بولمايدى.

  ادۆوكات: سىپات تولىق بولسا، ۇقىق - مۇددەنى دارىپتەۋگە بولادى

  4S دۇكەنىنىڭ ارەكەتى ورىندى ما، جوق پا؟ كىلتيپان شىققان كورسەتكى تاقتاسىن جوندەۋ كەرەك پە، الدە الماستىرۋ كەرەك پە؟

  «وسى تەكتەس جاعدايلار ۇنەمى تۋىلىپ تۇرادى». شينجياڭ شيڭحى ادۆوكاتتار باسقارماسىنداعى ۋاڭ جىيە ادۆوكات بىلاي دەدى: «جۇڭحۋا حالىق رەسپۋبليكاسىنىڭ تۇتىنۋشىلاردىڭ ۇقىق - مۇددەسىن قورعاۋ زاڭىندا» بىلاي دەپ بەلگىلەنگەن: تۇتىنۋشىلار تاۋاردى نەمەسە قىزمەت كورسەتۋدى تاڭداۋعا ۇقىقتى، تۇتىنۋشىلار تاۋارمەن قامدايتىن نەمەسە قىزمەت كورسەتەتىن تيجاراتشىنى ءوزى تاڭداۋعا ۇقىقتى، تاۋار ءتۇرىن نەمەسە قىزمەت كورسەتۋ ءتاسىلىن ءوزى تاڭداۋعا ۇقىقتى، ءارقانداي تۇردەگى تاۋاردى ساتىپ الۋدى نەمەسە ساتىپ الماۋدى، ءارقانداي تۇردەگى قىزمەت كورسەتۋدى قابىلداۋدى نەمەسە قابىلداماۋدى ءوزى بەلگىلەيدى. تيجاراتشى تۇتىنۋشىنى قاتىستى تاۋاردىڭ نەمەسە قىزمەت كورسەتۋدىڭ ساپاسى، قۋاتى، رولى، كۇشكە يە ۋاقىتى سياقتى ينفورماتسيالارمەن قامداعاندا، ناقتى، جان - جاقتى بولۋى، جالعان نەمەسە اعات تۇسىنىك بەرەتىن ۇگىت جۇرگىزبەۋى كەرەك.

  «جوندەۋگە كەلسە جوندەپ، جوندەۋگە كەلمەسە جاڭاسىن الماستىرۋ كەرەك». 4S دۇكەنى ادالدىقپەن تيجارات جۇرگىزىپ، الارماندارعا شىنايى قىزمەت كورسەتۋى كەرەك، - دەدى ۋاڭ جىيە.

  اۆتوكولىك يەسى كورسەتكى تاقتاسىن الماستىرماي، جوندەتىپ عانا پايدالانۋعا بولاتىنىن سىپاتتاي الاتىن بولسا، تۇتىنۋشىلار قوعامىنا شاعىم ايتىپ نەمەسە حالىق سوتى مەكەمەسىنە ارىزدانىپ، ءوزىنىڭ ۇقىق - مۇددەسىن دارىپتەۋىنە بولادى.

  ۋاڭ جىيە اۆتوكولىك يەلەرىنىڭ اۆتوكولىگىنەن كىلتيپان شىقسا، الدىمەن رەمونتحاناعا اپارىپ كورسەتىپ، كىلتيپاننىڭ قايدان شىققانىن ءبىلىپ العاننان كەيىن 4S دۇكەنىنە بارۋىن، تاراپتاردىڭ پىكىرى مەن ۇسىنىسىن ەستىگەننەن كەيىن، اقىلعا سالىپ كورىپ بارىپ جوندەتۋ نەمەسە الماستىرۋ بەكىمىنە كەلۋىن ەسكەرتتى.

جاۋاپتى رەداكتور: جانار قاناپيا قىزى
  • ورتالىق اسكەري ىستەر كوميتەتى 2018 - جىلعى اسكەري جاتتىعۋعا جۇمىلدىرۋ جينالىسىن اشتى
    شي جينپيڭ بۇكىل ارمياعا جاتتىعۋ بۇيرىعىن جاريالادى
  • جاڭا جىل بايلانىسىمەن كوركەمونەر ويىن نومىرلەرىن قويدى
  • «19-قۇرىلتاي رۋحىن دايەكتىلەندىرىپ، ۇلى ىنتىماقتىڭ جىرىن جىرلاپ، جاڭا داۋىرگە قادام تاستايىق» تاقىرىبىندا قيمىل وزدىردى
  • مەملەكەت ٴتىلىن ۇيرەنۋ قيمىلىن مال شارۋاشىلىق رايوندارىنا دەيىن جەتكىزدى