اعاجاي-التاي تورابى   ›   مادەنيەت ارناسى   ›   ونەگە

ادام بولۋدىڭ جولى

  الىستاعى ءبىر دوسىمنىڭ ماعان جازعان حاتىنىڭ توسەگىمنىڭ باسىندا تۇرعانىنا دا تالاي ۋاقىت بولىپتى. اينالا جىم–جىرتتىققا شومعان شاقتا حاتتى قولىما ەپپەن الىپ وقي باستادىم. بۇل حات بەينە مەنىڭ ءىس–ارەكەتىمدى تارازىلاپ تۇرعان سەكىلدەنە بەرەدى.

  دوسىمنىڭ حاتى وتە قىسقا جازىلعان. كىرىس ءسوزى دە، سوڭعى ءسوز دە جوق. ءار جولى حاتتى وقىپ بولعانىمدا جان دۇنيەمدە وراسان زور تولقۋ پايدا بولادى. تەك مەنى تولىق تۇسىنەتىن ادامدار عانا وسىنداي اسەرلەندىرەتىن سوزدەر ايتا الادى.

  العاشقى كۇندەردە ول حاتتى قايتا اشىپ وقىعىم كەلمەيتىن. ونىڭ ۇستىنە بۇل حاتتى ۇمىتۋعا تىرىسىپ كوردىم. اقىرى دوسىمنىڭ حاتىن تاعى ءبىر رەت وقىعانىمدا مەن ونىڭ ايىتقاندارىنا مويىنسال بولدىم.

  دوسىم حاتىندا بىلاي دەپتى: ادامدار ۇنەمى تۇرمىستىڭ قاربالاستىعىنا، مويىنىنا اۋىرتپالىق تۇسكەنىنە كۇرسىنەدى. ىندىنى كەتىپ، ءبارىن دە يەمدەنگىسى كەلەتىندىكتەن نە بولماسا تاقاتسىزدىقتان كەيبىر نارسەلەردەن ايرىلىپ قالادى.

  كوپتەگەن ادام ىستەۋگە ءتيىستى ىستەرمەن ابىگەرلەنسە دە كوبىندە وزىنە قاتىسسىز ىستەرمەن قاربالاسقا تۇسەدى. ايتالىق قوناق كۇتۋمەن ابىگەر بولادى، زاتتىق قاجەتى مەن قۇر اتاق–داڭق ءۇشىن اقشا جيناۋمەن جانتالاسادى، وزىنەن جوعارىلارعا جارامساقتانىپ، ءمانساپ الۋ ءۇشىن شاپقىلايدى، قولىنداعى قىزمەتىنە قىزۋ ىنتامەن بەرىلمەيدى، سونىمەن قيالى تۇراقسىز دا تۇرلاۋسىز كەلەدى. قىزىل تاناۋ بولعاندار تاياز قۇدىق قازعانمەن بارابار.

  بىرەۋ ءوزىڭدى بۇيدالاپ الىپ اناعان دا مىناعان دا سالىپ ىستەتسە، ونى قابىلەتىمدى كورسەتەتىن، كاسىبىمدى دامىتاتىن تابىلماس وراي بولدى دەپ ويلاما. سەبەبى سەن بىرەۋدىڭ مۇرىندىقتاۋىندا تاياز قۇدىق قازىپ جاتىرسىڭ، كورىنگەن جەردى قوپسىتقانىڭمەن دە سۋدىڭ قاينار كوزى تابىلمايدى. بۇل ىسكەرلىك ەمەس، قايتا ءومىرىڭ مەن دارىنىڭدى ىسىراپ ەتكەندىك. ادامنىڭ كۇش–قۋاتى مەن ۋاقىتى شەكتى بولادى. ومىرىڭدە ناقتى اۋەسىڭە قاراي تالانتىڭدى ۇشتاپ، بۇكىل زەيىنىڭمەن ءبىر ءىستى تاباندى ىستەسەڭ عانا، تابىسقا جەتە الاسىڭ. ول قاجىمايتىن شوگەلدىك پەن بار زەيىن–زەردەڭدى شوعىرلاندىرىپ جالعاستىرۋدى قاجەت ەتەدى.

  دوسىمنىڭ ايتقاندارى قاراپايىم ءارى قاتال شىندىق، ءاربىر اۋىز ءسوزى جۇيكەمە ءتيىپ، جانىمدى جاي تاپتىراتىن ەمەس. راسىندا سولاي ەمەس پە؟ دوستار ارا كەزدەسۋ، ساباقتاستار باس قوسۋى، قىزمەتتەستەر ارا شۇيىركەلەسۋ بولسىن بارلىعىندا ولار جارعاق قۇلاقتارى جاستىققا تيمەي جۇرگەنىن ايتادى، نەدەگەن بىتپەيتىن قاربالاستىق! قاي كۇنى سوناۋ الىستاعى انام ەسىمە ءتۇسىپ، تەلەفون جالعاسام، مەن اۋىز اشپاستان بۇرىن انام:

  – قاربالاس ەكەنىڭدى بىلەمىن، دەنساۋلىعىڭا كوڭىل ءبول!– دەپ مەنى جۇباتا باستادى.

  سوندا ءبىز تەگى نەمەن قاربالاس بولىپ ءجۇرمىز؟

  تاياز قۇدىق قازۋمەن!

  قانداي جاندى تەڭەۋ! ورتا مەكتەپ وقىپ جۇرگەن كەزىمدە ەسىمدە قالۋىنشا، ءتىل–ادەبيەت ساباعىندا ءبىر تاپسىرما بار ەدى سۋرەتكە قاراپ سويلەيتىن. سۋرەتتە قۇدىق قازىپ جاتقان ەكى ادامنىڭ بەينەسى سىزىلعان، بىرەۋى قول ۇشىمەن قازادى. بوس توپىراقتى قازعان بولىپ، مىنا جەردە سۋ جوق ەكەن دەپ مىڭقىلداپ بارىپ تاعى ءبىر جەردى شۇقىلاپ تۇرادى، ەندى بىرەۋى التى ايرىعىنان تەرىن سورعالاتىپ، تاستاقتى جەردى تەرەڭ قازىپ، سۋ قاينارىن تاۋىپ الادى. بىرەۋىنىڭ تۇرلاۋسىزدىعىن مىنەگەن، ەندى بىرەۋىنىڭ تاباندىلىعىن ماقتاعان تاپسىرما مازمۇنى ويىمدا بۇلدىر ەلەس بولىپ قالىپتى.

  سونان بەرى ون نەشە جىل وتە شىعىپتى، ومىردە راسىندا ءبىرتالاي سۋ شىقپاس شۇڭقىرلار قازدىق–اۋ.

  دوسىم جازعان حاتتى وقىماس بۇرىن، مەن ۇنەمى جۇمىستىڭ بارىسىنا عانا نازار سالىپ، ناتيجەسىنە كوڭىل اۋدارماي، جاستىقتىڭ جالىندى جىگەرىن قور ەتىپ، بىقسىعان شالانى لاۋلاعان ءورت دەپ ءجۇرىپپىن–عوي.

  وسىنىڭ بارىنەن كوڭىل كۇيدەگى ۇشقالاقتىق بايقالادى، ال ۇشقالاقتىق جاستار اراسىندا تەز جايىلاتىن جۇقپالى دەرت ءتارىزدى. ادەتتە باسقالار ءبىزدى تاياز قۇدىق قازۋعا سۇيرەلەسە سوعان ءماز بولامىز نە سوعان وزىمىزدە پەيىلدىلىك تانىتامىز. سەبەبى، بۇل ءبىر ءتۇرلى اعىمعا اينالعان.

  ادام ۇشقالاقتىقتان قاڭىرىعى تۇتەگەن شاقتا عانا ەس–اقىلىن جيىپ، تەرەڭ قۇدىق قازۋعا قۇلشىنادى، سەبەبى تەرەڭ قۇدىقتىڭ سۋى عانا سارايىڭدى اشادى.

جاۋاپتى رەداكتور: ءاننا اكىمقان قىزى
  • باي مازمۇندى قيمىلدار وتكىزىپ، پارتيا 19-قۇرىلتاي رۋحىن ۇگىتتەدى
  • ازىقتىق ساڭىراۋ قۇلاقتى سىناق رەتىندە ەكتى
  • «تۋىسشىلاۋ اپتالىعى» قيمىلى ءار ءبىر جۇرەكتى نۇرلاندىردى
  • رۋحىمەن نۇرلانىپ قۇرىلتايدىڭ، تۋىستار تۇرلەندىردى قيمىل ٴسانىن