اعاجاي-التاي تورابى   ›   اقپارات ايدىنى   ›   سۋرەتتى حابارلار

كوركەم تابيعات كورىنىسى

  تەمىرقازى ءمۇتان ۇلى.

  تىزبەكتەلىپ توبەمىزدەن قايتقان قۇستىڭ داۋىسى ەستىلە كۇزدىڭ سارسامالى ۇدەي سوعىپ، جاسىل جەلەك جامىلعان گۇل رەڭدى سارتۇسكە بوياپ، ماسايراي ىرعالعان الىپ اعاش بۇتاقتارى تۇگەلدەي جاپىراعىنان تونالىپ، ءۇپ ەتكەن جەل شىقسا بولدى ىڭىلداعان ءىزىڭداعان داۋىس شىعارىپ جۇرەككە وزگەشە وي سالادى. شىعستان سوققان كۇز جەلى ادامىنىڭ بويىنا سۋىق كەۋلەتىپ، سۋ بەتىن سيىر تاڭدايلاپ، اعاش جاپىراقتارى جەر بەتىنەن ورىن تاپپاي بەزەكتەپ، جاۋىن كورگەن جالعىزداي بەزەكتەپ جۇر. ە،ە، كەشەگى كولەڭكەسىن تانىماي قالعان جاپىراقتىڭ بۇگىنگى تاعدىرى كوز الدىمنان وتىپ جاتىر...

  ءسابيدىڭ تاتتى ءيسىندەي تابيعاتتىڭ تازا ءيىسى جانەدە جانىڭدى جادىراتادى. كول بەتىندە كوزگە شالىنار ەشتەڭە بولماعانىمەن، تۇنىق سۋدان قايتا كورىنگەن تابيعات تىپتىدە تۇلەجىپ، سۋ استى دۇنيەسىن قالىپتاستىرىپ، قاراعان سايىن ەنتەلەپ سۋعا اياعىڭ قاي ۋاقىتتا مالىنىپ كەتكەنىن وزىڭدە سەزبەيسىڭ. سالقىلداپ كەلىپ جاعانى ۇرىپ، ارناسىن مۇجىپ جاتقان كول تولقىنى، قاناتى سىنعان كوبەلەكتەي قالبىراقتاپ كەلىپ كول بەتىنە تۇسىپ جاتقان جاپىراقتى كول شەتىنە سىرىپ، باسپالداقتانا باستاعان كول جيەگىنە سىرۋدا.

  تابيعاتتىڭ مىڭ بۇياۋى الىدە وشكىندەمەگەن. جازدىڭ كۇنىندەي ەمەس قۇبىلتا سايراعان قۇستار ءۇنى ازايىپ، تابيعات وركەستىرى دەمالعانداي بەينە بايقاتادى. ارعى بەتتەگى ايۋ جوندانىپ جاتقان قۇم توبەشىكتەر كول استىنان ايباتتانىپ كورىنەدى. كول شەتىندە ەتەكتەنىپ جاتقان اققۇمدى باسقان جەرىڭ شورەلەنىپ ۇيالانادى.

العا ءبىر ادىم جۇرسەڭ ارتقا جارىم ادىم كەيىندەتىپ،شارشاعانىڭدى دەمىڭ سىعىلعاننان بىلەسىڭ. توبەسىنە شىققانشا سوراڭ شىعىپ، قىزىل مايىڭ شىعادى. قۇيىرىق قويىپ وتىرساڭ را تومەن اعىپ وزىڭدى ەتەكتەن كورەسىڭ. كەمپىر شاشتانىپ جاتقان اعاش تۇبىندەگى مايسالار ىعى-جىعى بولىپ رەڭىنەن ايىرىلا باستاعان. اسپانداعى تەڭ-تەڭ بولىپ كوشكەن بۇلتتار بۇرىنعىدان سالماعى ارتىپ قارا قوشقىلدانا تۇسكەن. ارجاعىنان سىعالاعان كۇن سۇلۋ كول بەتىن ايناداي جارقىراتىپ قاراۋعا كوزىڭ ۇيالادى. كول تۇبىندەگى كۇن ساۋلەسى مەرۋەتتەي جارقىراپ اينا كولدىڭ قۇدىرەتىن تىپتى دە ارتتىرا تۇسكەن. كول بەتىندەگى تۇسكەن جاپىراقتار كول بەتىن قايىق قىلىپ سەرۋەندە جۇرگەندەي تولقىنمەن جاعالاسىپ، جەل باعىتىمەن جەتەر جەرىنە كەتىپ بارادى...

جاۋاپتى رەداكتور: جانار قاناپيا قىزى
  • «تۋىستاسۋ اپتالىعى» دوستىق قيمىلى ارقىلى قارىم-قاتىناستارىن نىعايتتى
  • ۇلاستى قالاشىعى «ۇلتتار ىنتىمعاعىنىڭ بەرەكەلى شاڭىراعى» اتىنداعى ارقان تارتۋ جارسىن وتكىزدى
  • پارتيا 19-قۇرىلتاي رۋحىن ۇيرەنىپ دايەكتىلەندىرۋ تاقىرىبىنداعى دەكلاماتسيا جارىسى ءوتتى
  • كوكساز قىستاعىنداعى ءار ۇلت باۋىرلاستار ۇلتتار ىنتىماعىنىڭ جارشىسى بولدى